عموما عندي صبر كبير على الاشياء، الظروف او الشغل او التعلم، لما حاجة منهم مبتمشيش زي ما انا عايز بفضل احاول كأني آلة، لكن مع الناس معنديش، هي مرة واحدة لو حسيت اننا مش هنقدر نتفاهم او مفيش بيننا اي ارض مشتركة في التفكير شكرا فرصة سعيدة ولو انت مصمم هاخدك على قد عقلك، الحياة قصيرة

ساعات بشوف ده ميزة لأن مش اي حد يقدر يسمع كلام غبي وميستفزش يرد او حتى يعقب، وساعات بشوفه عيب، هو في الحقيقة بيوفر وقت كبير لكن بيرفع معدلات اللامبالاة وده مش دايمًا شئ كويس، عند درجة معينة من اللامبالاة مش بس بتفقد حماس الكلام حوالين موضوع، انت بتفقد اهتمامك بالموضوع كله

بعد ما بتمرر سلسلة من فقدان الاهتمام بموضوع ورا موضوع نظرتك للحياة بتبقى عدمية تماما، عدد الحاجات اللي بتحركك حزنا او فرحا بيفضل يقل وجدار عازل كبير بيتبني بينك وبين معظم الحاجات اللي كنت بتحبها او مهتم بيها

لغاية ما (وياللغرابة) الفرقة اللي بتشجعها تلعب ماتش مهم، بتتسحب فجأة من كل الضباب اللي حاوطت نفسك بيه وتلاقي نفسك فجأة عايش الحدث بكل تفاصيله، مفيش شئ تافه، مفيش شئ يمكن بسهولة التغاضي عنه، كل حاجة تستحق تقف عندها، الكورة تقريبا هي السلاح الوحيد والمهرب الاخير من محيط اللامبالاة