قاعد اقرا كتاب كدا عن الجسم وفي الفقرة بتاعت الدم اتكلم عن فهم الدم زمان عند الناس وال"دكاترة" حقين زمنهم.
وصراحة حاجة تخليك تحمد ربك مليون مرة انك اتولدت في العصر دا.
حوريكم شوية من الحاجات الغريبة هنا.
في ١٦٦٠، في عالم اسمه لوار كان مهتم ومقتنع جدا انه بيقدر ينقذ الناس من حاجات كتيرة عن طريق نقل الدم. في ١٦٦٧ وقدام نخبة من العلماء في لندن، وبدون اي فكرة عن تبعات الحاجة دي، لوار نقل ربع لتر دم من خروف حي لي يد شخص اسمه ارثر.
الناس فضلت تستنى تشوف حيحصل شنو لكن مافي اي شي حصل وارثر مشى وما عنده اي مشكلة.
والغريبة انه كرروا العملية بعد اسبوعين وبرضو ما حصلت اي مشاكل. ودي حاجة غريبة لانه لما مادة غريبة تدخل الجسم عن طريق الدم، المريض بخش في صدمة.
النتائج دي شجعت ناس تانيين في اوروبا انهم يجربوا نقل الدم ويضيفوا عليهو لمستهم الخاصة.
المتطوعين ديل نقلوا ليهم حليب، خمر، بيرة وحتى زئبق. بالاضافة لي دم أي حيوان من الحيوانات الاليفة. في أغلب الاحيان النتيجة كانت موت شنيع ومؤلم قدام الناس. وبسرعة اتمنعت تجارب نقل الدم.
بعد فترة الطب دخل واحدة من أظلم فتراته ومع انه العالم كان بيتطور في اي مجال، الطب كان ماشي في انحدار. ولغاية ١٨٦٥ يقال انه الطب في احسن الظروف انه كان ما يضرك زيادة اذا ما قتلك ولا زاد مرضك.
