من فتره كبيره كنت عايز أروح أبارك لصديق ليا كان لسه متجوز ومكنش معايا يومها فلوس ؛ حطيتله ١٠٠ جنيه في ظرف مع كارت كتبت عليه
الله يعلم والأيام تعلمنا ، أنّا كرامٌ ولكنا مفاليسُ !
صديقي بيقولي إن الكارت الوحيد اللي لسه محتفظ بيه بعد ما يقرب من ٦ سنين جواز !
أول ما اتخرجت كل اللي جوم زاروني جابوا معاهم تورتات وشيكولاتات وكنا ناكل حاجة بسيطة ونوزعهم علي اللي حوالينا ؛ ماعدا صديق واحد ؛ لقيته جايبلي كيس مليان زيت وسكر وحاجات كتير من حاجة البيت ؛ قالي معلش مقدرتي مش كبيرة وهتحتاجهم !
دلوقتي أنا مستحيل أنساه هو ابدًا !
والد أحد أصدقائي مهندس مشغول جدًا بالتزامات لا نهائية بدعيله دايماً في صلاتي ؛ لو سألتني عن أكتر حاجة مميزة فيه ؛ هقولك عمري ما كلمته او بعتله رسالة أو واتس اب إلا ورد عليا ، ولو مردش يرجع يتصل بيا ؛ مفيش مرة واحدة نسي !
وانا رايح الشغل في موعد متكرر كل يوم ، وكان في واحد بشوفه كتير بس معرفوش ؛ انطباعي عنه انه حد تنك ؛ في مرة في عز الشتاء واحنا مستنيين العربيه تحمل لقيته نادى على عمال النظافة وجابلهم شاي وطبطب على ضهر واحد منهم ودعالهم ربنا يقويهم ومشي !
لحد دلوقتي بحاول اكرر الحاجه دي اللي اتعلمتها منه وبدعيله وانا عمري ما اتكلمت معاه ولا شوفته تاني من فتره كبيره !
ف أسهل وأجمل حاجة ممكن تقدمها لنفسك وللي حواليك انك تكون انسان لطيف ، دي مش محتاجه فلوس ولا تكاليف !
