كوني طالب ثانوي محبط و يائس سابقاً ( دفعة ٢٠٢٠ ) ? حبيت أشارككم بعض الأشياء عشان تقدروا تتجاوزوا هالمرحلة بأقل الخساير المادية و النفسية ?
#اختبار_الرياضيات
من حقك كطالب تتضايق إذا الاختبار صعب، إذا الاختبار سهل بس ما عرفت تحله، إذا مذاكر و غلطت، إذا ما مذاكر بعد يحق لك تتضايق لأن المشاعر ما محصورة على فئة معينة و محرمة على أخرى، مشاعرك تحترم مهما كان جهدك و يحق لك رعاية نفسيتك و يحق لك الناس تحترم مشاعرك ❤️
بتجيك لحظات ندم و لحظات تمني مستحيلة، أتذكر كنت أتمنى ينزل مرسوم سلطاني عشان يزيدونا درجات ?? المهم كل هذا طبيعي بسبب الضغط و دام الاختبارت و المذاكرة تضغطك لا تجي انت بعد و تضغط على نفسك و تزيدها، حاول لا تعصب على نفسك لمدة طويلة، الي راح يعور صح لكن بيدك تخلي بكرة أفضل.
إذا ما مخلص المنهج و عندك وقت بسيط، وزع جهدك و مذاكرتك على كل وحدات الكتاب و لا تركز انك لازم أول تخلص وحدة كاملة بعدين الي بعدها و كذا، بالعكس ذاكر أول درس من الوحدة الأولى بعدين أول درس من الوحدة الثانية و كذا، لأن الاختبار ما بيكون محصور و الأفضل يكون عندك معلومة من كل وحدة.
خذ قيلولة، نام، شرب شاهي أو قهوة، اطلع شم هواء كله هذا عادي تسويه، ما ضروري ٢٤ ساعة تكون ع الكتاب، لا تحس بالذنب و انك لازم تكون منتج في كل ثانية، في النهاية انت بشر و تتعب و تحتاج تعيد شحن طاقتك، صح ذي سنة حاسمة بس هذا ما يعني تقتل نفسك بالحزن و الضغط و كل شيء خيرة والله.
