البقاء لله حماتى اتوفت بسبب الكورونا مع ان العينه طلعت سلبيه اه بسبب كورونا اللى قفل المستشفيات ومنع المرضى باى حاجه من أنهم يتعالجوا.. ماتت بسبب كورونا لأن جالها ضعف بعضلة القلب ومفيش مستشفى فى مصر رضيت تستقبلها والمستشفيات قافله الطوارئ والعيادات والعمليات والعنايات المركزه
علشان خايفين من كورونا ماتت زى مالراجل اللى جاله نزيف فى المخ وقعدوا يلفوا بيه علشان مستشفى تقبله يومين ومعرفوش علشان المستشفيات قافله بسبب كورونا ماتت علشان اى حاله مهما كانت خطورتها بتتحط بره المستشفى ولو حرارتها عاليه بيمشوها ولو مش عاليه بيعملوا لها آشعه مقطعيه على الصدر
قبل مايحطوا عليها سماعه علشان خايفين من ام كورونا ماتت علشان الهيستريا اللى ضربت القطاع الصحى وخلت أكبر المستشفيات قافله بيبانها ومش بتستقبل حالات علشان خايفين من كورونا ماتت حاله لو دخلت عياده ودكتور طلب لها فحوصات وآداها علاج كان زمانها عايشه ماتت علشان ناس روجت الرعب من كورونا
ماتت بسبب جشع مستشفيات قفلت بيبانها احتجاجا على تخفيض اسعار الرعايه عندها اللى زادت حوالى عشر أضعاف سعرها قبل كورونا ماتت علشان عضل قلبها ضعف وكانت محتاجه علاج مخدتوش علشان سعادة المدير رفض يدخلها المستشفى
ماتت علشان سيده فى أواخر السبعينات من عمرها سلبيه لكورونا ومع ذلك لفيت بيها من 10 بالليل ل 5 الصبح ومش قادر ادخلها مستشفى لأنهم مرعوبين من الكورونا
