في مناقشة مع أحد المغتربين، سألته عن مميزات وعيوب السفر.. قالي ان هناك في بلاد الفرنجة، السيستم أقوى من الأفراد، مفيش وسايط ولا مجاملات.. القانون يتم تطبيقه على الكل.. طالما بتدفع ضرائب، لك حقوق "مش جمايل" وتاخد خدمات.. ولك الحق تشتكي من أي إهمال في بلدك لأنك بتدفع
الشكوى هناك مش معناها انك خاين أو أنك ناكر للجميل.. معناها انك صاحب حق ومواطن.. معناها أيضا ان المسؤولين هم موظفين مش ألهة.. وقالي عن العيوب في بلدنا.. اول حاجة ذكرها هي النصب والاستكراد.. و ان مفيش تطبيق لقانون يحمي الناس من الناس.. لو انت مش عارف ثمن السلعة، هيتضحك عليك
لو مش فاهم في الخدمة أو خبرتك قليلة، هيتضحك عليك في سعرها وفي الخدمة نفسها.. أي حد عنده فرصة ياكلك على قفاك، مش هيتردد.. وقالي انه هنا مش متأكد انه هيعرف ياخد حقه.. لأن فيه وسايط كتير، وفي تجاهل للحقوق طالما التعديات ما ضايقتش المسؤولين وما اتذاعتش على عدسات الكاميرا!
قالي ان البلد أصبحت طاردة للاستثمار والسياحة.. الاستثمار عشان مفيش استقرار وبكرا الصبح ممكن تلاقي قرار يوقفلك حالك.. و ده حصل في مارس اللي فات مع المستوردين.. والسياحة مضروبة بسبب الدروشة والتحرش.. والاتنين متسابلهم الحبل على الغارب!
وقالي في الاخر حاجة وجعتني.. المواطنين مش بيحبوا بلدهم.. بيخربوها، ويوسخوها ومش خايفين على البلد ولا على بعضهم.. تشعر انها مش بلدهم، جايين ينهشوا فيها ويدمروها.. اللي بيرمي زبالة واللي بيسرق واللي بينصب واللي بيهرب أثار.. ده كان ملخص الكلام! يللا بينا ندفن راسنا في الرملة..
