مش هنسي يوم ما طلعت عمرة مع أهلي و كان عندي حوالي ١٦ سنة و الحماسة واخداني و قررت أدخل خناقة الحجر الأسود.
للي ميعرفش الحجر الأسود عشان توصل له فيها عركة محترمة بتاع ٥٠ دقيقة زق و تشليت و مقصات خلفية ف الخباثة و حاجة قمة ف انعدام الروحانيات
و وقتها العسكري اللي بيتشعبط فوق الحجر الأسود كان ماسك خرزانة و نازل فينا لسوعة لو لقانا بدأنا ندخل علي طابور الستات، أو عشان ينقذ حد بيتدهس أو عشان معجبوش شكلك.
المهم الموقف كان مفيهوش أي روحانيات بس الواحد كان شباب و فيه روح المغامرة و الفرهدة
المهم بعد عناااااء و خنااااق بقيت خلاص علي بعد قفا عرقان واحد من الحجر الأسود و جهزت البوسة، جه الدور عليا و المزيكا عليت و خلاص أهه هبوس أخيرا .....
لقيت حاجة بتلعب ف جيب الجلابية اللي فيه التليفون النوكيا ال٦٦٠٠ الجديد
طبعا مخي قفل و سبت الحجر الأسود و قفشت ف ايده اللي ماسكة التليفون و اتدورت
لقيت نفسي بواجه حوالي ١٢٠ وش غاضب إني مش ببوس الحجر الأسود و سادد الوصول ليه و مش فاهمين ليه، و أنا مصمم أتتبع الإيد ديه لحد ما أوصلها بجسم و وش الحرامي ابن الكافرة ده اللي بيسرقني ف قمة روحانيتي
طبعا تبتت فيه و ابتديت أزعق حرااامااااي كأي مصري أصيل ف أطهر بقاع الأرض و فاكر إني هلاقي تشجيع و مساعدة ف القبض عليه لقيت خرزانة بتلسوع جنب ودني و شتايم بالسعودي عشان طولت عند الحجر لدرجة إن الناس بدأوا يبوسوني أنا شخصيا
