نصيحة الناس اللي بتعمل إطعام جاف أو شنط إطعام كل فترة أو ناوية تعمل شنط رمضان
امبارح سألت عدد من الأسر رقيقي الحال تحبوا نحط إيه في الشنطة
عملت استفتاء سريع ، ودي نتيجة الاستفتاء .
١- الرز أحسن من المكرونة ، أنا خيرتهم بين كيلو رز ولا ٣ اكياس مكرونة ؟ https://t.co/TqF5aL7XC8
الإجابة كانت كيلو رز بالإجماع ،
وتفسيرهم إن المكرونة مش بتشبع ، وعشان تعمل حلة مكرونة لازم صلصة أو طماطم ، ودي تكلفة عليهم ، أما الرز يادوب معلقة زيت وشكراً ، واي حاجة جنبه وتبقى غدوة ملوكي .
٢- الفاصوليا أحسن من اللوبيا ؟ فيه ناس قالت احنا بناكل الاتنين وناس قالت مش بناكل اللوبيا ، بس محدش اعترض على الفاصوليا .
٣- العدس حبيب الملايين كله بيحبه وفيه إجماع عليه ، شغال صيف شتاء مش بيقول لااة ، وأقل كمية ممكن تعدي اليوم وجنبه رغيفين عيش والحمد لله .
٤- الزيت مهم جداً جداً وحتى الأسر اللي بتصرف تموين كمية الزيت مش بتكفيهم ، وخصوصا بعد ارتفاع أسعار الزيت .
الشاي والسكر طبعا مفيش بيت مش بيستخدمه .
وفي آخر الاستفتاء لقيتهم بيقولوا ايه يا استاذ مفيش فراخ ولا ايه ؟
حبايبنا عايزين فراخ ، اوعوا تنسوا الفراخ .
واهم حاجة اوعوا تنسوا كيس الملح في الشنطة .
الشنطة حتخلص بعد يومين تلاتة وكيس الملح حيقعد شهر ، وكل رشة ملح بحسنة .
أنا مقتنع إننا خدامين الناس دي ، هما يؤمروا واحنا ننفذ .
وكده كده احنا حنشتري وحندفع فلوس ، يبقى نجيب الأنسب ليهم ?
منقول
