الدكاتره اللي لسه متخرجين و عايزين يحضروا معادلات بس عندهم مشكله في التكلفه في الثريد دا هتكلم عن مجال شغل ممكن كتير مننا منعرفوش بس ممكن يساعد في التغلب علي الحاجز المادي

المجال دا هوا ال medical insurance اللي ممكن تشتغله في شركات التأمين او المستشفيات الكبيره و في معظم الاماكن بيكون في وظايف للدكاتره في مجالين المراجعه الطبيه و الموافقات الطبيه

المميزات :

١) مرتب ثابت تقريبا من ٨٠٠٠-١٠٠٠٠ جنيه

٢) اماكن كتير بيكون فيها الشغل flexible hours او shift based ودا بيخليك تقدر تمشيه مع التكليف او النيابه

٣) من بعد الكورونا في شركات او علي الاقل departments لسه working from home ودا هيخلي اي حد من بره القاهره عنده فرصه يشتغل فيه

٤) الشغل مش مجهد بدنيا لانه شغل مكتبي مفيش فيه جدال مع عيان او خناقات استقبال

٥) الدكاتره اللي بيشتغلوا في المجال قليلين و دا بيخلي الدكتور دايما مطلوب و مش صعب تلاقي فرصه شغل فيه او علي الاقل مش محتاج واسطه عشان تتقبل

٦) في اماكن بتكون ماشيه بنظام التارجت و دا بيخليك مش مضطر تكمل ال ٤٠ ساعه شغل لو خلصت شغلك

٧) ليك تأمين صحي لو لا قدر الله تعبت او اي حاجه تقدر تتعالج في اي مكان private من غير فلوس او بسعر بسيط