كنا في العيد وقاعد في حنه مع واحد صاحبي متجوز ؛ فحبيت اسأله اي رايك في الجواز !
قالي كل حاجة بتفرق ؛ الجواز مرتبط بالتفاهم وان محدش يدخل بينكم ، يعني انا مثلاً واعد مراتي بعد نص ساعة من دلوقت اخدها اعشيها بره واعزمها علي شاورما ؛ قولتله هتاخدها بره علشان شاورما !
قالي الستات دول بأبسط حاجه تطلعهم سابع سما وابسط حاجه تنكد عليهم ؛ اهم شيء بالنسبالها تكون معايا واوفي بوعدي !
عندك إمبارح مثلاً لقيتها قاعده علي السرير مكشره سألتها مالك يابنتي ! قالت مفيش ، من هنا لهنا حلفت تقول مالها ؛ لقيتها بتقولي انت اديت اختك وبنت اختك عيديه ومدتنيش !
قولتلها يبنتي ما الفلوس في المحفظه ع الكمودينو هو انا عمري حوشت عنك حاجه ! قالت لا انا كنت عاوزه عيديه تديهالي إنت مش انا اللي آخدها بنفسي ! قولت طب متزعليش ياستي ، وقومت ضارب ايدي في المحفظه ومطلع ١٠٠ جنيه وبوست راسها وقولت كل سنه وإنتي طيبه ؛ لقيتها ضحكت وفرحت وقالت ايوه كده !
بيقولي الغريبه إنها بعد ما خدت ال ١٠٠ جنيه فتحت المحفظه وحطتها فيها تاني !!
ده يثبتلك إن المسأله بتفرق ، وإنها عمليه تقديريه مش اكتر ؛ فإوعي تحسسها إنها مجرد حاله بتعيشها ؛ بإيدك تخلي علاقتكم انجح علاقه ، وبإيدك تخليها العكس !
البنات كلهم عجينه واحده ؛ بيفرق معاهم التفاصيل ، ومش البنات بس ؛ معظم الناس عامةً بيفرق معاهم ادق التفاصيل !
- افتكر من ٤ سنين كنت مع واحد صاحبي وروحنا لاخوه الصغير مدرسة الابتدائي ، وكان واخد معاه علبة شيكولاته ، وإستأذن من مدرس الفصل ودخل وزع الشيكولاته علي زمايل اخوه كلهم ،
