من عرفت نفسي وأنا عندي معاناة مع النوم، ماخليت طبيب ولا علاج ولا نصائح الا سويتها لكن بدون نتيجة. الحمد لله بعد هالتجارب عرفت لنفسي وطبيعة جسمي وصار نومي أفضل من أول بكثير ? بعطيكم تجربتي (الشخصية)

من صغري نومي حده ٤ ساعات تقريباً، ولا أتذكر اني نمت أكثر من ٣ ساعات متواصلة، كنت أقوم وراسي منتفخ نوم لكن أعجز انام! كان شي متعب جداً جسدياً ونفسياً واجتماعياً، وجهي ذبلان وجسمي مكسر ونفسيتي مضروبة

راجعت أطباء متخصصين منهم نفسية ومنهم أعصاب، وكان العلاج غالباً حبوب نوم أو أرق وقلق، وجلسات، جربتها فترة لكن ما تحسن نومي لازال مثل ماهو (صبة رده)

بعدها أقتنعت اني لازم اعتمد على نفسي، واعرف ليش نومي كذا! وش أفكر فيه ووش جدولي وحتى وش آكل.. بديت أدقق في كل شي لأني ابحث عن جواب يساوي راحة ما تُقدر بثمن. حطيت لي بعض الشروط الي ضروري التزم فيها وهي:

1- أثبت وقت نومي والصحيان مثلا أنام الساعة ١١م وأصحى ٦ص حتى لو ما شبعت نوم أقوم

2- ما اخذ لي غفوة أبد مهما أكون تعبان

3- امتنعت عن الكافيين (قهوة - شاي - بيبسي)

4- قبل وقت النوم بساعتين أبدأ اشرب مشروبات مفيدة للاعصاب (البابونج - اليانسون)