سألت نفسي ؛ هو القدر بيتغير !
يعني ممكن انجح ، عُمري يزيد ، رزقي يبقي واسع ، اتجوز اللي قلبي بيتمناه !
من فتره امي كانت جايبه نوع صابون بتغسل بيه المواعين ، المُهم انه كان بيسمّر ايديها وبيخلي جلد ايديها ناشف ومشقق ، لحد ما غيّرت نوع الصابون ، ف رجعت ايديها مع الوقت لطبيعتها !
الحقيقه إن حياتك الناشفه المشققه من قلة السعاده ومسوده ؛ ممكن تكون سببها إنك مبتغيرش طريقتها !
بمعني ؛ ربنا بيقولك " وهديناه النجدين " !
ربنا قالك الشر اهو والخير اهو ؛ اختار بقي الطريق اللي يريحك !
قادر انت دلوقت تقول استغفر الله وتاخد ١٠ حسنات وقادر تسب الدين وتاخد سيئه ؛ مفيش حاجه مانعاك !
نفسك تعيش كتير ؛ ممكن تبقي ترفع في اي وقت تليفونك وترن علي خالتك ، جدتك ، عمتك ، عمك ؛ وبكده عمرك يطول لان النبي قال "العمر يزيد بصلة الرحم" !
وربنا قال " لكل أجل كتاب " ؛ كُل إنسان ليه ميعاد هيموت فيه !
وبعدها قال " يمحو الله ما يشاء ويثبت " ؛ ربنا قادر يمحي ميعاد موتك ويغيره بمُجرد إنك تصل رحمك ، وقادر يثّبته لو إنت معملتش اللي أمرك بيه !
نفسك تنجح ، تخلف ، ربنا يهدي نصيبك ؟
ممكن تقول دلوقت يارب نجحني ومتفضحنيش ، يارب إرزقني ذريه صالحه ، يارب إهديلي نصيبي ؛ وقادر إنك متدعيش وتسيبها زي ما تيجي ، والدُعاء بيغير القدر ؛ الدعوه قادره تشقلب حالك من فاشل لناجح ، من فقري لمُرزق !
