في الشهور الفاتت ديل عرفنا حاجات كتيرة عن الفايروس الجديد المسبب الهلع في العالم حاليا كوفيد-١٩ (SARS-CoV-2)
بس لسة في اسئلة ما اتجاوبت
جا من اي جنس من مملكة الحيوان؟ هل هي الخفافيش ولا حيوان البنغول (اكل النمل الحرشفي او الـ pangolin) ولا نوع تاني غير الاتنين ديل؟
ظهر وين اول؟ في غابة او كهف في مقاطعة خوبي الصينية؟ ولا مكان تاني؟
في ٢٧ ديسمبر ٢٠١٩، ٤١ من الحالات بتاعت كورونا كان عندها تقاطع مع سوق ووهان
بس المريض البشري اللقط المرض لأول مرة ما كان في السوق ولا اتقاطع معاه، بل بالعكس؛ التأريخ الجزيئي بيشير لانو الإصابة الأولى بترجع لشهر نوفمبر
فايروس الكورونا المسؤول عن الالتهاب الرئوي الحايم الايام دي تركيبو الوراثة مكون من ٣٠.٠٠٠قاعدة و ١٥ جين (مُورّثة)، من بين الخمسطاشر جين ديل منهم الـS gene المسؤول عن صناعة البروتين البيكون قاعد في مُغلّف الفايروس من برا
و بإستخدام التحليل الوراثي و المقارنة فايروس كورونا دا مشابه للفايروس العمل سارس في سنة ٢٠٠٣
و سارس دا كان الخازن ليهو (reservoir) هو الخفافيش
و من ٢٠٠٣ فايروسات كتيرة تابعة لعائلة الـ Betacoronaviruses تم اكتشافها و منها RaTG13 البيشابه الفايروس العامل كورونا دا اسي بنسبة ٩٦٪
