موازنة السودان للعام ٢٠٢٠ بحسب القريتو و فهمتو بتساوي ٥٦٨ مليار جنيه بما يعادل ١٢.٦ مليار دولار

بعجز مقدارو ١٧٣ مليار جنيه (١.٦ مليار دولار)

الـ١٢.٦ مليار دولار البتعادل ميزاينة دولتنا دي مقاطعات الصين لحدي نهاية شهر واحد كانت خاتاها لتمويل العلاج و المستلزمات الطبية ?

و في شهر ٢ الفات دا البنك الصيني المركزي ضخ ١٧٣ مليار دولار في مساعيهم للحد من انتشار كوفيد-١٩ و آثارو

انا ما بعرف رياضيات كتير، بس الواضح انو الصين وفرت لمجابهة كورونا مبالغ مالية في ٣ شهور بتعادل ميزانية دولتنا بعجزها لاربعطاشر سنة لقدام

و تقول لي كان جا بنقدر عليهو؟ كيف بس

و العلي القدير الشغلة كان ترّت علينا مافي واطة نقبِّل عليها

الدولة لا طاقة لها بالمرض

عشان كدا

عشان كدا قبل كدا تغرب شمس البقعة البنسميها وطن دي و نغتس حجرها بغباءنا و استهتارنا

مفروض ندرك الخطر و نتفاداه؛ غسل يدينك و ما تهبش لا وشك لا نخرتك لا خشمك

جمال الأرقام اننا ممكن نطوعها زي ما عايزين من غير ما نغيّر من مصداقيتها

معدل الوفيات كنتيجة للكورونا حولين العالم بحسب منظمة الصحة العالمية هو ٣.٤٪