بص يا سيدي ..

بدايتها كان تواصل وتسليه..

انتشرت و دخلت كل بيت فبقت بيزنس..

واحده واحده سيطرت علي النفوس فبقت محور الحياه..

لقينا علاقات انتهت،اسر اتفككت ونفسيات ادمرت..

صراعات وضغوطات وامراض نفسيه زادت..

عيوب وعُقد ومعادن رخيصه بانت..

الرضا قل والقناعه اختفت والانسانيات انهارت..

القيم والمبادئ والعيب والحرام بقوا موضه قديمه..ڤيروس هيدمر فطرتنا بعد ما يجيب اخلاقنا وثقافتنا الأرض..دوامه ادمان غرقانين فيها بمزاجنا ومبسوطين وفاكرين اننا مسيطرين..كلام مش جديد عارفينه وحسينه ومكبرين دماغنا وكمان دمه تقيل..طبعاً الرد جاهز..ان خلاص ده واقع والعالم كله كده..

تمام..لو قريت اللي فات كله ومستني حل فانا زيك معنديش بس عندي حاجه أخطر..

حد شايف إن قدام عنينا جيل بريء بيتم برمجته بالتدريج؟

حد شايف تاثير دوامة الإدمان اللي احنا فيها علي ولادنا؟ بيتزرع فيهم ايه؟

يقبلوا ايه ويرفضو ايه؟

حاسين بهوية المجتمع اللي بتتغير سِنه سِن و تأثيرها عليهم..؟

طب عايز ايه يعني؟..مش عايز حاجه غير اننا نلحق ولادنا وبناتنا..

نلحقهم قبل مايتخطفوا..

قبل مايتوهوا ونتوه معاهم..نحميهم ونفهمهم ونتعلم معاهم..

نحاول ونتعب النهارده بدل ما نعيط ونندم بكره..نندم لو كبروا من غير فطره نضيفه ومبادئ..من غير هويه ولا انسانيه ولا دين..من غير روح..

يبقوا ولادنا في البطاقه بس..

حتي لو فشلت حاول تاني و تالت عشان علي الاقل تبقي عملت اللي عليك..

الحياة بكل اللي فيها لا تستحق الكفاح..بس ولادنا يستحقوا..

احنا مسئولين قدام ربنا عن الفعل..عن المحاوله..مش علي النتيجه.

معلش كلمتين فضفضه ملهومش لازمه من أب..

ماتاخدش فبالك..