مريضي رئيس شركة متقاعد عمره ٨٥ سنة لما شفته، كان عنده ضعف شديد في عضلة القلب مع مليون قصة تانية من شرايين مسكرة و اضطراب كهربا و ما كان قادر يتنفس. بدل ما يكون قلبه ٦ سيلندر، كان ٢ سيلندر. و يضل يتراكم السوائل في الرئة.

في اميركا قانونيا لازم بنسأل الناس عن ال code status يعني بتحب نعمل الك كل اشي باستطاعتنا ؟ او نعطيك بس أدوية تريحك؟ (و هيك بعدها بموت) مع انه زلمة كبير في السن بس يحكي انه بده انه نعمل له كل اشي. في مرة من المرات دخل المستشفى و كان سوائل شديدة و صار على جهاز التنفس.

فزوجته الجديدة الي اصغر منه ب٢٠ سنة صارت تحكي: ما بدي يتعذب. هو عاش حياة كويسة. خليه بس مرتاح و اسحبو الاجهزة.

قلتلها امهلينا بس كم يوم. الموضوع بس نسحب منه السوائل. وافقت و فعلا تحسن. و زرعناله بعدها جهاز بساعد عضلة القلب CRTD. وطلع من المستشفى و تحسن كتير!

رجعنا بعدها بالتهاب بكتيري بالجهاز. اضطرينا نشيله و نعطيه مضاد حيوي، صابه بعدها فشل كلوي، زوجته تحكي: ما بدي اياه يتعذب خليه مرتاح، هو يحكي لأ بدي كل اشي. و بعدها يتحسن. رجعنا زرعناله جهاز على الناحية التانية. بعدها صابه نزيف في المعدة من المميع. زوجته تحكي : بدي اياه مرتاح

keep him comfortable.

هو يحكي لأ. بدي كل اشي. .

زرعناله جهاز watchman الي بيمنع الخثرات في القلب و بيغني عن المميع، فوقفنا المميع و بعدها صار زي القرد!

مبارح بعد ٣ سنين من لما شفته اول مرة اجاني على العيادة ، عمره صار ٨٨ سنه، و بيلعب جولف و عم يستعد يسافر على فلوريدا