هلا والله

مع طفرة الترفيه بدت تكثر مرة ثانية طلبات الشريك التقني عندي فراح اتكلم بواقعية عن الموضوع و اعطي البديل المناسب و الصحيح في حال ما حصلت "شريك تقني" ، الثرد موجه بشكل اكبر لغير المبرمجين و الناس اللي عندهم افكار يبون يطبقونها

اول نقطة و تكلمت عنها كثير هي "الشريك التقني" : يا جماعة حط نفسك مكان المبرمج و كل يوم يجيك واحد يقول عندي فكرة بتكسر الدنيا ابي شريك تقني ، المشكلة ان المبرمج ما يعرفك فبالتالي شي شبه مستحيل انه يدخل معك ، يعني لو جاني شخص عنده مشاريع ناجحة و يبي يطبق فكرة اوكي ما عندي مشكلة

انا ادري انك فاهم وش تسوي و ادري ان عندك فلوس تدعم الفكرة و اعرفك فاقدر اثق في انك بتسوي اللي تقدر عليه عشان تنجح الفكرة بس اذا ما اعرفك مستحيل الا في حال كنت مستعد تدفع لي حق شغلي و اذا اشتغلت الفكرة و بدت تدخل فلوس او بديت اشوف انها ناجحة هنا اعرض علي فكرة الشراكة اما قبل لا

في اي مكان تروح و تشوف واحد يتكلم عن التطبيقات اول نصيحة بيقولها لك هي انك تشوف لك شريك تقني وكلامه منطقي في بداية المشروع اهم شي تسويه تقلل نفقاتك ، بس هل هذا الشي سهل ؟ جداً صعب الا اذا تعرف شخص و تقدر تقنعه غيرها صعب خصوصاً ان العرض حقك يجي للمبرمج مليون مرة في الشهر

طيب ما حصلنا شريك تقني وش الحل ؟ طبعاً الحل هو انك تشوف لك مبرمج و تدفع له او شركة و تدفع لها ، بس قبل كذا حط في بالك نقطة الموضوع ابداً مو وردي لا تتوقع انك بتقول ابي تطبيق فكرته كذا و يجيك بالضبط نفس اللي في بالك و لا تتوقع انك بتقدر تكتب ال reequirements بنفسك