ياحمود يظهرلك صديقٍ من القوم
ويظهر من الربع الموالين عدوان
بيت مشهور جداً وأصبح مثل يضرب لصداقة الغريب وعداوة القريب والبيت من قصيدة لها قصة بقولها لكم وتحملوا الإطالة شوي
راعي القصيدة والقصة رجال إسمه (مفضي بن ولمان الأحمدي الحربي)صارت عليه قضية (دم)قتل رجال قبل الحكم السعودي وعجز عن دفع الجزية من القل وخاف على نفسه وجلى (رحل) عن ديرته وربعه بإتجاه الشمال من اطراف المدينة ووصل جبل (رمان) جنوب حايل وقريب من الجبل قرية إسمها (الصداعية) لفخذ العليان
من شمر ولا علمهم من يكون ووش مشكلته والعرب منول ماينشدون (الجلاوي) وشعندك ووش جايبك المهم إنه قال يدور شغل ويترزق الله وإشتغل عن الأمير يرعى الإبل وبالمساء يسوي القهوة ببيت الامير .
والأمير له بنت أسمها (رثعا) لها حلال وبيوم من الأيام جتهم غارة والأمير وأكثر ربعه ماهم موجودين
وصاحت رثعا وفزعت الموجودين وفزعوا وسمع مفضي الصياح وهو عند إبل الأمير وجاء وأخذ الفرس وفزع وهو راكب الفرس يتعزوى والله ماتقفي بها وأنا الأحمدي والله ماتقفي بها وأنا الأحمدي وأوحت رثعا عزاوي مفضي ولحقهم وذبح اللي ذبح ورد الحلال وجاب خيل اللي ذبحهم مع الحلال وعطاهم رثعا ورجع لحلال
الأمير بالمرعى لين أمسى الليل ورجع لبيت الأمير لشغلته يسوي القهوة والامير وربعه يتسامرون ويتعللون وتبينت على أبوها وإستأذنته تدخل عندهم وسمح لها ويوم دخلت قالت لابوها لي مطلوب قال وش مطلوبك نادت مفضي من عند الدلال وجلسته جنب ابوها وصبت له فنجال القهوة وابوها وربعه مستغربين
