حاجة مهمة بس
هو إحنا ليه بيحصل بينا مشاكل أيام الخطوبة !
- خطيبي اتخانق معايا علشان خرجت مع أهلي من غير ما أقوله ، وأنا والله حاولت أستأذنه بس تليفونه كان غير متاح !
- خطيبي زعلان علشان طلب مني أروح أساعد مامته في تحضير أكل علشان عاملين عزومة ، وأنا معرفتش أروح !
- خطيبي زعلان علشان حاول يمسك إيدي وأنا اتكسفت ، فزعل وفضل يقولي لما انتي خطيبتي ومش عارف أمسك إيدك ، أمال أروح أمسك إيد مين !
خطيبي بيزعقلي ، خطيبي عايزني أستأذنه ، خطيبي عايز يخرج معايا من ورا أهلي
ف ٩٠% من مشاكل الخطوبة ليها سبب واحد بس وهو إنك أصلا بتديله حق مش من حقه أساسا !
جلسة الخطبة بتبقى جلسة مكاشفة لكل حاجة ؛ الطرفين بيفكروا فيها ونفسهم يلاقوها في شريك الحياة
على الشاب أو البنت إنهم يصارحوا بعض هو نفسهم في إي ويسألوا بعض هل الطلبات دي متوفرة أو على استعداد للتغير ليها ولا لأ ، وبعدها بيكون قرار القبول أو الرفض قائم على مدى الاستعداد من كل طرف !
المشكلة الكبرى خاصة في الرجال ؛ إنه مش بيوضح قناعاته دي من البداية وبيدخل بنية مسبقة لتغيير الطرف التاني ، وبيبدأ الضغط بدون تنبيه مسبق أو توضيح لطلباته دي قبل اتمام الخطبة !
الخطوبة هى وعد بالزواج ممكن يتم وممكن لأ !
الشاب سواء معرفة مسبقة أو زواج صالونات بيجي يتقدم للبنت وبعد ما توافق وهو يوافق بتتم الخطبة وبيتم تحديد وقت معين للزواج !
من وقت ما الخطوبة بتبدأ لحد ما يحصل كتب الكتاب خطيبك ده يعتبر أجنبي عنك ، ولا يحل لكي ولا يحق له التحكم فيكي !
