#الإهتمام ??!

• كان في واحدة وافقت على الخطوبة وهي ما مقتنعة عشان ترضي أهلها وتقدر تعمل الحاجه العايزاها هي، كانت مقرره إنها لما تحقق الفي راسها حتلغي الخطوبة ..

ما كانت بترضى تقعد معاهو ولا حتي تتكلم، كان بحاول يقرب منها وهي رافضه تماماً،

كان دائماً بتصل ليها بعد كُل إمتحان ويسألها عملتِي شنو، حليتي كويس؟ كان بسأل عن صحتها، لو عِرف إنها عايزه تقرأ كورس معين يسأل عليهو ويقول ليها شرح مُبسط عن الحتستفيد منو وأحسن مكان تاخد فيهو الكورس دا وين، كان كُل يوم بعرفها أكتر من أول وكانت هداياهو دليل أنو فعلاً عارفها،??

جاب ليها مرة سيرمس صغير تشيلو في شنطتها لما عرف إنها بتشرب نسكافي كتير، سافر مرة عشان يجيب ليها نسخة من الكتاب اللفت عليهو وما لقتو، إلخ إلخ ..

إتصل مرة عليها عشان يطمئن ويشوفها هي كيف؟ وهي كانت بترتب مع صحبتها العروس شقتها، فحسه أنو صوتها ما كويس،??

سألها لو في حاجه ! قالت ليهو إنو ما لاقيين عربيه والناس البتشيل، وفي ظرف ساعه جاء عندها مع أصحابو بعرباتهم، نقلوا معاهم وغيرو مود البيت بحالو وكان فيهو ضحك وربّه كدا أكتر من يوم العرس..

الوقت عدى على خطوبتهم، إكتشفت لما غاب يوم عنها إنها إتعلقت بيهو وبسؤالو عليها وحبتو،??

حبت إهتمامُو وحبت وجودو الفرق معاها وملأ حياتها .. كانت بتقول أنا عايزه شنو غير كدا! زول بستغل كُل فرصه عشان يقرب لي، مُهتم بكل المُهتمه بيهو، بشاركني كل تفاصيلي، عارف حتى نبرة صوتي لما بزعل؟ طبعاً لازم أتزوجو )"??