البورصة بالدارجي السوداني
كتير مننا الواحد يسمع عن البورصة او سوق الأوراق المالية، بنشوف في النشرات ارتفع سهم كذا وانخفص سهم شركة كذا، بس ما بتكون فاهمين حاجة وغالبا بنغير القناة لمن نسمع الحاجة دي.
سوق الأوراق المالية من اسمه هو سوق زي اي سوق بس يختلف عن باقي الأسواق انه سوق منظم يعني ما زي سوق الله اكبر، طبعا لمن نقول سوق معناها فيه بايعين ومشترين واكيد ولازم تكون في بضاعة الناس تتعامل فيها
طيب اسواق الاوراق المالية دي شنو وعملوها ليه وبكون فيها منو والبستفيد منها منو؟
نمسكها واحدة واحدة من خلال المثال الحنقوله ده، اتخيل انت واخوانك متشاركين اي واحد برأس مال معين عاملين اسم عمل شغالين مقاولات بناء وتشييد بتمسكوا الارض تتفقوا مع اسيادها تبنوها وتشيدوها،
الشغل ماشي معاكم تمام التمام، جا واحد صاحبكم قال ليكم عنده ليكم فكرة انه اسم العمل مفروض تكبروه لأته شغلكم ماشي حلاوة ما شاء الله تبارك الله والناس مبسوطة منكم، ليه ياخي ما تدخلوا في عطاءات كبيرة وتستلموا تشطيب أبراج عالية،
طبعا جوابكم الأول حيكون انو نحن ماعندنا تمويل للشغل الكبير دا ايوا نحن واثقين من شغلنا بس نجيب قروش من وين قدر دا نحن حيلتنا نمسك بيت، شقة، بالكتير طابقين،صاحبهم دا تاني جاهم ونق ليهم كتير في الموضوع دا، قالوا نقعد ونشوف الحاجة دي هل بنقدر عليها
