طبعا في فرق بين زول قفل الجامعات عشان خايف منك
و زول قفل الجامعات عشان خايف عليك
زول منع التجمعات عشان بتشكل ليهو مهدد امني
و زول بينصحك بانك تتجنب التجمعات عشان فيها مهدد صحي ليك
الكورونا ما زي امريكا تحت جزمتنا للأسف ?
ولا زي البشير القدرنا عليهو في ٤ شهور
بس ممكن نحاول نختها في فتيل بسلوكياتنا
اسي الجامعات و المدراس قفلت نقوم نعديها طلعات و فسح و نعتبر التقفيلة دي اجازة مش؟
طبعا لا، و في حالة اننا عملنا كدا ف نحن بنعيد في السيناريو الايطالي
ايطاليا كان عندها اجراءات احترازية شديدة من اول ظهور الفايروس، حتى انها قفلت مجالها الجوي في وجه الرحلات القادمة من الصين و لاقت انتقادات لاذعة وقتها, قفلو اي حاجة، اعلنو حالة الطوارئ لمدة ٦ شهور
بإختصار كدا حكومة ايطاليا عملت اي شي بيضمن الحد من العدوى و خطواتها العملتها دي مثال يحتذى بيهو في التصرف السليم السريع
