النهاردة هنتكلم عن واحدة من أقدم الملاحم الأسطورية المعروفة للبشر، الملحمة السومرية الشهيرة جلجامش Gilgamesh.. https://t.co/bmx7PRZcdW

نبدأ القصة من عند بطلنا الأسطوري جلجامش ابن الربّة نينسون Ninsun والملك نصف البشري لوجلبندا Lugalbanda، وده معناه أن جلجامش نفسه كان ربع بشري وثلاثة أرباع إله. المهم، بعيدًا عن المِكس جرل ده، جلجامش كان بطل مغوار ومعروف عنه القوة والجمال ومكانش حد بيعرف يقف قدامه،

ده بجانب أنه كان ملك مدينة أوروك Uruk اللي كانت من أكبر وأهم الممالك وقتها. وبما أن محدش كان بيقدر يتحدى جلجامش بسبب قوته الأسطورية المفرطة فطبيعي أنه بدأ يطغى ويعامل رعاياه وممتلكاتهم على أنهم مِلكه، فكان بياخد اللي عايزه منهم وبيفرض الضرائب المجحفة عليهم وبيستبيح نساءهم..

فالناس استغاثت بالآلهة وطلبت منها المساعدة لكبح جماح جلجامش، وبالفعل الآلهة استجابت لأهل مدينة أوروك بأنها صنعت إنسان بدائي من الطين على نفس مقدار قوة وعزيمة جلجامش واسمته أنكيدو (بتُنطق أنكي-دو) Enkidu.

أنكيدو زي ما قولنا كان إنسان بدائي بشعر طويل مغطي جسمه كله (في بعض المنحوتات القديمة كان بيتصور بقرنين زي قرون الحيوانات) ومابيعرفش يتكلم وفضل عايش مع الحيوانات في الغابة بيصطاد ويأكل معاهم كأنه واحد منهم لحد ما شافه صياد من أوروك واستغرب جدًا أن فيه إنسان عايش بالمنظر ده.