#أهم ثريد حتقروهو الليلة:

حصل قالو ليك أقيف زي الناس؟ ولا اقيفي عديل؟ ولا امك ادتك محاضرة عشان كنتو برة وكنت قاعد قعدة غلط؟ مرات التعليقات دي بنشوفها غياظة لكن مهمة.

الposture او التموضع بتاعك او وضعية جسمك اثناء ما انت واقف ولا قاعد هي أساس كل حركة بيقوم بيها جسمك. https://t.co/BUm1m9pfCz

وممكن تحدد كيفية تكيف الجسم مع الضغوط البيتختى فيها. الضغوط دي ممكن تكون حاجات ملموسة زي انك تشيل وزن مثلا أو انك تقعد بي طريقة غلط او غريبة. بالاضافة للضغط الكلنا بنتعرض ليهو يوميا، الجاذبية!

لو تموضع جسمك ما كان مثالي، عضلاتك بتحتاج تتعب أكتر عشان تخليك مستقيم ومتوازن. https://t.co/9JxcpaHV3A

جزء من العضلات دي حتكون مشدودة وما مرنة، جزء تاني من العضلات حتكون معطلة وما مستخدمة. مع الوقت، العادات الغلط دي حتضعف قدرة الجسم على التعامل مع القوى المختلفة البتقع عليو كل يوم. https://t.co/dQDRtatuDy

التموضع الغلط بيؤدي برضو لي تآكل وتمزق أكبر للمفاصل وألاربطة والحاجة دي بتزيد فرص وقوع حوادث لي بعض اعضاءك زي الرئة مثلا، حتشتغل بي كفاءة أقل.

الباحثين ربطو ما بين التموضع الغلط واعوجاج العمود الفقري، والصداع بتاع التوتر، وآلام الضهر. مع انه ما هو المتسبب الوحيد للحاجات دي. https://t.co/tD4ogG7hBv

تموضع الجسم ممكن يؤثر حتى في حالتك العاطفية ومدى احساسك بالألم.

عشان كدا في أسباب كثيرة بتخليك تحرص انك تقيف بوضعية كويسة.

لكن الموضوع بقى صعب شديد الايام دي، الجلوس بطريقة خاطئة لمدة طويلة ممكن يشجعك على التموضع الخاطئ، بالإضافة لي استخدام الكمبيوتر والتلفون الخ. https://t.co/Z4FuclWjpU