حاحكيلكم حكاية يومي النهاردة ياشعب ? مكسوفة من كل دقيقة عمري تذمرت فيها من أي حاجة اعتقدت إنها صعبة

كنت في هذا المدعو كايرو فيستيڤال سيتي ? وطبعا أول مرة أروحه لإني مابحبش المشاوير. كالعادة بحب أرغي مع الناس ولقيت جنبي بنتين لطاف كده فالنص الأول من العشرين فقعدت أرغي معاهم أسألهم جايين منين بيعملوا إيه بما إني من كارهي المولات والشوبنج ?

واحدة ساكنة فناهيا وبتشتغل فالتجمع والتانية ساكنة فشبرا مصر وبتشتغل فالتجمع ? مفهوم طبعا ماعندهمش عربيات وبييجوا المشوار ده بمواصلتين ويروحوا بمواصلتين وبيدفعوا فاليوم الواحد ٥٠ج و٦٠ج مواصلات ? والباقي من المهية بعد كده مش كتير طبعا

قعدت أسأل ليه مابيشتغلوش قريب من بيتهم قالوا ده ال لقوه بمؤهلاتهم وواحدة فيهم كانت بتشتغل فالعاشر كمان بس تعبت مالمسافة وفرحت لما لقيت فالتجمع أقرب. ساعتين ونص بس مواصلات وساعات ٣ الحمد لله مش ٤ ? يعني اليوم مقطوع منه ٥ أو ٦ ساعات مواصلات بس. طبعا باعتبار الميكروباص جاهز ومستني

قضيت اليوم هناك ووأنا مروحة فالمطرة لقيت الطريق مقفول عشان فيه بركة مية كبيرة وعربيات عطلانة ? لفيت مع العربيات ووقفت أسأل فالكمين أروح ازاي عشان لما الچي پي إس يتوهني أبقى فاهمة ? الأمين ال شرحلي الطريق لطيف ومبتسم وهو واقف تحت المطرة وأنا فهمي على أدي فالطرق فعمالة أسأل تاني