الاعراض الانسحابية للكافيين والنيكوتين والسكر لحد يستهين فيها ،، قروب الجيران متهاوشين من العصر ومكبرين الموضوع بسبب كلمة ،، المشرف قال شرايكم بفكرة فلان؟؟ رد واحد وقال (خرافيه) ،، فلان زعل مرة وعيا يسكت يقول تراه يقصد يسبني (خرا - فيه) وان هذا تقليب كلام مقصود وضرب تحت الحزام
الصدق ان هالقروب كلهم ملكعين وراعين تقليب كلام وفترة العصر دايم فاضين نقاشات ومبادرات واقتراحات لكن برمضان تصير فترة العصر هوشات واجواء مشحونة ،، وهذا اللي مخلي النقاش مشدود والطرفين كلهم يعاندون بعض ،، المهم المشرف اعرفه مثقف هادي وثقيل ومحايد ،، حاول يهديهم اكثر من مرة ماقدر
حط ادعية حط مقاطع ضحك ،، كلها مانفعت ولا وقفت نقاشهم،، ارسل لي خاص قال تداخل معي عشان نغير جو ونسكتهم ،، تداخلت معه عن موضوع الارصفة الجديدة اللي بيحطونها في الحي ،، وانه لازم نتطوع بالتشجير ،، قال المشرف شرايكم بمبادرة الاخ عادل؟؟ رد الزعلان وقال خرافيه هههه يبي يحسسني بمعاناته
مع تقليب الكلام وانكم لازم تفزعون معي ،، رديت وقلت الخرافي راسك ياجعل راسك يسلم ،، الاول حط ضحكة طويلة ،، خوينا ماتحمل وغادر المجموعة ،، المشرف جاني خاص زعلان يقول مالك حق لازم تراضيه ،، قلت ابشر بعد الفطور ،، وفعلاً رجعناه بعد الفطور واعتذر ان القهوة والدخان دايم تخليه مشدود
وانه يوم افطر حس بتأنيب الضمير والحين ابشركم رجعت المياه لمجاريها وكل المداخلات نصايح عن كظم الغيظ واحتساب الصيام
المهم الدرس المستفاد: اي مشكلة هذي الايام أجل حلها بعد الفطور وبتنحل
