طالما الجيل بتاعنا بدأ يجيب ورا جسديا ونفسيا وبقى ناقم على أسلوب الحياة ومتطلباتها المستحيلة ومش قادر يلحق بركب مترو حلوان المرج حتى،بقترح ندشن رابطة "على بركة الله" ودي أعضائها هيتعلموا إزاي يقابلوا أي تحدي في حياتهم باللامبالاة مع إيماءة خفيفة بالرأس وتمتمة جملة "على بركة الله"

واحد يجي يقولك "إزاي ماسافرتش غير 3 بلاد بس؟ده أنا سافرت 34 بلد الشهر اللي فات وعديت على 5 قرى ونجعين" تروح تهز رأسك وتقوله "على بركة الله"وتكمل شرب الشاي،أو واحد يجي يقولك فيه مسلسل رهيب أكتر من نص سكان المجرة شافوه،تهز رأسك في سلام وتقول "على بركة الله" وتكمل فرجة على توم وجيري

أو تلاقي أصحابك قاعدين يهزروا بإفيهات من على تويتر أنت مش متابعها ولا فاهم منها حاجة، فتبتسم لهم ببلاهة وتقول في سرك "على بركة الله".. أو تلاقي صاحبك اللي في سنك خلص 3 ماجستير و2 دكتوراه وأنتج 12 فيلم وثائقي فتتمتم بهدوء "على بركة الله" وتكمل لعب في اللاڤ هاندلز بتاعتك.