#رابطة_المتكممين

#فضفضة_المتكممين

اليوم أكملت سنتين #تكميم عمري ماأحتفلت بعيد ميلادي الحقيقي لكن هذي السنة الثانية اللي أحتفل فيها بميلادي التكميمي لإنه حرفياً أجمل ميلاد كسبت فيه صحتي وعافيتي ورشاقتي ونفسيتي وثقتي بنفسي سنتين مرت بتعبها وهمها وجمالها مريت فيها بكل أنواع التعب

النفسي والجسدي ماكانت سهلة أبد لكن كنت أحاول أستمتع بكل مرحلة وفعلاً أول أسبوع كانت مثل الكابوس روتين جديد حرمان من الأكل تعب جسدي دموع نفسية كنت أكلم الاخصائية تقولي نورة امشي تبين تتعافين امشي اقولها نفسيتي مو تمام تقول امشي وتتعافين استجمعت نفسي ومااستسلمت للانعزال وفعلاً مشيت

المشي كان سحر طلعني من التعب الجسدي والنفسي ومن هنا أنصحكم فيه سحر على الجسد والنفسية والنزول أمشوا ي جماعة مر أول اسبوع قررت اسوي جدول اجهز وجباتي ورياضتي عشان ماأنحاس واخبص وفعلاً جهزت قائمة وحددت مدة المشي ولما اختم اليوم احط صح جنب اللي نفذته وكان عندي طاقة جممميلة

ولما دخلت الأكل العادي دخلت في وسواس الخوف اني اذا اكلت ماانحف واذا اكلت بيزيد وزني وكنت اخاف من الأكل خوف حقيقي صرت موسوسة وكنت لو أكل بيضة اقوم امشي عشان احرقها فقلت لا عاد !! معقوله بجلس كذا يعني لا وانا دبه مرتاحه ولا وانا في طريق الرشاقة مرتاحه فقررت اكلم كذا اخصائي تغذية

كلهم أجمعوا انه التغذية مهمه ولازم وجبات متعددة وراح ينزل وزنك اكثر تطمني فعشان اقنع نفسي لازم اجرب وكسرت خوفي وجربت وفعلاً نظمت وجباتي وصرت اكل ٦ وجبات واشوف الملابس تتوسع علي مع الوقت هالشيء خلاني ارتاح نفسياً واستمر واعطاني طاقة غريبة وصرت اعرف ان الموضوع نمط صحي فقط