ناس كثير يسألوني كيف الوضع عندك بالسودان وقررت أكتب

روتيني اليومي هنا

• أقوم من النوم الساعة ١٢ الظهر غالباً وأفطر اقعد شوي وادخل تويتر لين الساعة ١ ومنها اروح العب بالـPC الى الساعة ٣ غالباً أطلع برا اتمرن بالنادي وما الى ذلك حياة شاب عادية.. الى هنا كويسين صح؟ ولكن للأسف...

تغيب الشمس وتغيب معها الراحة والحياة المثالية وتبدأ المعاناة وأول محطاتها عند صف محطة البنزين.. السودان حالياً يعاني من أزمة وقود يعني إذا تبي تعبي بنزين توقف ٥-٩ ساعات "بدون مبالغة" وفي ناس يقعدون نصف يوم او اكثر .. طيب طلعت من صف البنزين بعد ساعات من الوقوف في الصف وطقني الجوع

ارجع البيت وأقول لجدتي وين العشاء تقول مافي خبز واطلع من البيت على أساس ألحق عالمخبز قبل لا يقفل وصلت المخبز ولكن للأسف في صف طوييييل قدام المخبز وهنا نجي عند الأزمة الثانية اللي هي الخبز أبسط مقومات الحياة.. طيب الحين شسوي؟ اوقف بالصف مع الناس ولا اكنسل عشاء؟

هنا انا بين أمرين يا اني اوقف وانا مو ضامن اني اشيل خبز لأن دوامهم قرب يخلص والناس اللي واقفة بالصف كثيرة او اني ارجع البيت واتعشى سلطة وأشياء خفيفة؟.. نقول مثلاً أخذت خبز ورجعت البيت وأكلت الحمدلله بعد عناء طويل.. -تقريباً الساعة بوقتها راح تكون ١١ الليل او غالباً ١٢-

ادخل تويتر اشوف وش اللي صاير واروح اشوف فلم او شي زي كذا وانام وبكذا يكون انتهى يومي اللي ضاع أغلبه وانا واقف طبعاً مو شرط كل هذا يصير لي بيوم واحد بس انا حاولت أجمع الأزمات كلها بثريد واحد..