كل الكلام اللي قيل ويُقال في حب الوطن والسلطان ما هيكون له أي معنى لو ما قابله أفعال تدل على صدقه.

بلدنا محتاجة لنا أكثر من أي وقت مضى، الأزمة الاقتصادية تضربنا للعام الخامس على التوالي وحكومتنا تقترض مليارات من بنوك عشان تغطي عجز الميزانية وعشان تدفع مصاريف البلد الأساسية.

التقرير الرسمي اللي صدر من الحكومة للعام 2020فيه أرقام مخيفة تتطلب منا ردة فعل تدل على حبنا لوطننا.

العجز في الميزانية 2.5 مليار!

مصاريف الحكومة 12 مليار ريال نصفها تروح رواتب الموظفين الحكوميين!

دخل البلد ثلاثة أرباعه من النفط والغاز اللي ممكن سعرهم يرتفع وينخفض في أي لحظة.

العجز التراكمي خلال السنوات الأخيرة وصل 20 مليار ريال.

16 مليار اقترضناها من بنوك بعد سنوات لازم نرجعها لهم مع نسب فائدة مرتفعة، و4 مليارات أخذناها من الاحتياطي العام للدولة.

كل هذي المعاناة ممكن تختفي لو ارتفع سعر النفط فوق ال80 دولار للبرميل، وممكن تزيد لو انخفض سعر النفط.

ما ممكن كبلد نربط مصيرنا ومصير أجيال من بعدنا بسعر برميل النفط. يرتفع وترتفع معه أحوالنا، ينخفض ونروح في مصايب وأزمات.

كل واحد منا واجب عليه يعبّر عن حبه لوطنه بإخلاصه في عمله، العالم اليوم مليان أمثلة دول اعتمدت على شعبها بدون أي موارد نفطية، موردهم الوحيد العلم والعمل بإخلاص.

موظف حكومي؟ تحب وطنك؟

تعامل مع كل ساعة عمل على انها شي مقدّس ومدفوع لك راتب عليها ولازم تحلل كل ثانية فيها وتجتهد وتعبّر عن حبّك لوطنك باجتهادك وإخلاصك في عملك.

راتبك ما يُدفع لك عشان تحط بصمة حضور وانصراف وما بينهما آخر اهتماماتك، انت جزء من الحكومة نجاحها نجاحك وفشلها فشلك!