في المقاهي نحتاج يكون في لوحة أو دليل "ذوقيات المكان"

• لما تشرب قهوة لاتطلع صوت عالي مثل صوت اللي يشفط الشاي

• المكان ماهو لك وحدك لما يجيك اتصال وتكون طبيعة المكان وفكرته هادئة أنك تطلع تتصل برا

• خفض صوت جوالك وسماعاتك

• جاي مقهى مو مكتب لاتفرش أغراضك كلها

- لما تكون مصاب مثلًا زكام -شفاك الله- احرص أنك ما تطلع صوت "تنشق" ويفضل اتباع وسائل الحماية الطبية حتى ماتنتقل العدوى

• لما تحس بنعاس جميل أنك ماتظهر صوت التثاؤب وكذلك تغلق فمك

• جميل جدًا أن تحمل وتنظّف بقايا ما استخدمت (قراطيس، مناديل، فتات أكل، ... ) ولاتتركها في مكانك

- لما تجيب عيالك معك .. الله يخليهم لك، بس أرجوك لاتحسسهم أنهم في حديقة.

• تقدر تسولف بصوت متوازن تسمعه ويسمعه اللي معك مو لازم تدخلنا معكم.

• إذا ضحكت الله يديم سعادتك لاترفع الصوت.

• لما يقومون الموجودين يصلّون .. احترم شعيرة الصلاة صل أو على الأقل خفض صوتك وصمت جوالك

- تكفى إذا جيت "تنحنح" لايسمعونك الجيران ،، أو اطلع برا وارجع

• لما تصيرون شله وفيه سواليف ### مالها داعي ترفع صوتك وكل المكان يسمعون المصطلحات اللي تحكيها

- إذا حسيت أنك بردان ترى مالها داعي كل شوي تفرك ايدينك قدامك شبة ضوء مثلا ولا ايش !!

• إذا تمغطت انتبه تشيل وجه اللي يمك.

• إذا سحبت الكرسي بتجلس ترى تقدر ترفع وتحطه بالمكان اللي يناسبك .. لاتجرجر الكرسي وتزعجنا بالصوت ياخي عيب عيب