بمناسبة حادثة القطر اللإنسانية اللي حصلت في مصر النهاردة.. حابب أكلمكم عن آلية التعامل مع اللي بيزوغوا من تذكرة القطر هنا في أوروبا وهحكيلكم عن حاجة غريبة حصلت في إيطاليا..

بشكل عام بيكون فيه شرطة في كل قطار أو بعض الدول بتتعامل مع شركات الأمن وتعين فردين أمن في كل قطار.. ??

أياً كان سواء رجل شرطة أو رجل أمن تابع لشركة خدمات أمنية.. دوره هو مساعدة الكمسري في أداء مهمته.. أو التدخل في حالات الخناقات مثلاً أو إدارة المواقف الحرجة زي حالات الأعطال مثلاً وتوجيه الركاب للتصرف السليم.. وكمان بينفع لمنع أعمال التخريب واللي أشهرها في أوروبا هو الجرافيتي! ??

فيما يتعلق باللي بيزوغوا من التذكرة أو ضاعت منهم أو أياً كان السبب.. فالدولة ممثلة في هيئة السكك الحديدية رافضة عموماً كلمة "المعلش" مافيش معلش..

لو مش معاك تذكرة أو تذكرتك منتهية الصلاحية أو نسيت الأبونيه.. برضه هتتحمل قيمة التذكرة بالأضافة لمبلغ الغرامة.. و ده بيتعاملوا فيه ??

ببطاقة الهوية وإرسال فاتورة مستحقة الدفع خلال 30 يوم من تاريخ الحدث ومن حقك مخاطبة هيئة السكك الحديدية ومحاولة الصلح ولكن بنسبة 99٪ بيتم رفض الصلح والتمسك بقرار الغرامة وقيمة التذكرة.. وفي حالة عدم الدفع تتضاعف القيمة وتتحول للمحكمة وقد يحدث حكم غيابي بقيمة جزافية.. ??

لا حل لها إلا الدفع أو الحبس أو الخدمات الإجتماعية المجانية لإنهاء الأزمة و قد تصل بعض الأحكام لمنع بعض الأفراد من استخدام القطارات..

في النهاية مافيش ضرب ولا خناقات ولا رمي الناس من قطار متحرك ولا فرض تجميع القيمة على باقي الركاب إلا لو تطوع أحدهم بدفع قيمة التذكرة والغرامة ??