لما كنت ف مصر فترة علاج ابوي الله يرحمه كنت مؤجر شقة ف مصر وجات علينا ازمة كورونا وعارفين كلنا كيف كانت الفترة ديك ، دق علي صاحب الشقة وطلب انه يقابلني عشان وقتها كان عقدنا انتهى ومفترض اكتب معاه عقد جديد او اخلي الشقة

قابلته ووريتو اني عايز اجدد العقد وما حقدر اطلع ، قالي ي ابني انا عايز اقلل عليكم الايجار بحكم الظروف الحاصلة ف البلد وشوف انت الرقم اللي مناسب معاك مهما كان وانا م عندي مشكلة مشى وخلاني ف حالة صدمة من كلامه بتذكر م قدرت ارد عليه بكلمه ولا حتى اشكره بالجد م عرفت اقول شنو وقتها

زول انا بالنسبة ليه اجنبي ف بلده م عندي بيه اي علاقة ولا عارف ظروفي ولا عارف اي شي بس اتعامل معاي بكل انسانية اتعامل ك انسان ، ونشوف هنا اولاد بلدنا وجلدتنتا وفي عز حاجتنا لي بعض ونحن ف حالة حرب الناس بتتعامل كيف ، سرقة ونهب وسوق اسود واستغلال ورفع اسعار

شيء مؤسف صراحه ف حقنا كسودانيين ، اي صح ديل م كلنا وفي الزول الكويس والكعب ف كل مجتمع وكل مكان لكن انا بتكلم عن واقع حاصل الليلة اي زول ف يده شي بيستغل الناس بدل يساعد بيصعب بدل يسهل بيستغل اي ازمة ف صالحه ، للأسف بديت اقتنع انو الحاصل دا ابتلاء من ربنا وغضب

على اخلاقنا اللي اتغيرت وقيمنا وتفكرينا وتقصيرنا ربنا قال (إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ ) طول م نحنا كدا عمره السودان دا م حيمشي لي قدام وحنكون كدا عكس الناس راجعين لي ورا بدال نتقدم