من فترة اتكلمت عن المغنيسيوم في تويت مختصرة جداً لكن عشان هو عنصر غذائي مهم لدرجة محدش يتخيلها محتاجين نتكلم عنه باستفاضة اكتر، سوو عزيزي القارئ أعرني انتباهك الكام دقيقة الجايين، ثريد

قبل ما ابدأ محتاجة اقولك ليه مهم ناخد من وقتنا شوية نقرا فيهم الكام سطر الجايين:

أولاً: لأن اكتر من ٣٢٥ انزيم من الانزيمات المسؤولة عن الوظائف الحيوية الأساسية في جسمنا شغلهم مرتبط ارتباط مباشر بوجود المغنيسيوم، يعني من الآخر ده عنصر داخل تقريباً في كل حاجة بتحصل جوة جسمك

ثانياً: لأنه عنصر أساسي في الحفاظ على صحة كل خلايا الجسم وكمان صحة المادة الوراثية DNA

ثالثاً: المغنيسيوم من أهم العناصر المسؤولة عن تصنيع الطاقة داخل خلايا الخلية وبالتالي إنتاج الطاقة في الجسم ككل عشان كده نقصه بيسبب الإحساس بالتعب و الإرهاق العام ومشاكل تانية هنقولها قدام..

رابعاً: المغنيسيوم شغله مرتبط ارتباط وثيق بالكالسيوم، لو نسبة الكالسيوم زادت في الجسم ده بيعمل مشاكل كتير أهمها تكوين حصوات الكلى و تصلب الأوعية الدموية ونقص مرونتها (وبالتالي الإصابة بارتفاع ضغط الدم) لكن في وجود المغنيسيوم فرص حدوث المشاكل دي بتقل جداً

: من أهم وظايفه إنه:

• بينظم مستوى السكر في الدم عشان كده أساسي في الوقاية من مقاومة الأنسولين
• مهم لتنظيم ضربات القلب
• بيحسن الدورة الدموية بيحسن مرونة الأوعية الدموية وبيمنع تصلبها وبالتالي بيمنع ارتفاع ضغط الدم
• مهم للعظام والعضلات والمفاصل
• مهم لتحسين جودة النوم