بابا أتجوزها بعد موت أمي بشهرين. عمري وقتها كان ست سنيين كرهت بابا وكرهتها قبل ما تدخل بيتنا.. و كرهتها بعد ما دخلته برغم إن عمرها ما عاملتني بطريقة تضايقني بالعكس ! كانت بتهتم بيا و بتراعيني زى ما أكون أبنها.
كل يوم بكبر فيه بعرف عنها حاجة عرفت إنها اتطلقت عشان مبتخلفش
بابا اختارها عشاني عشان مش عايز ابن أو بنت ينافسوني ف حبه ليا.
الأيام عدت بينا بسرعة رهيبة ! بابا دايماً مشغول هي دايما موجودة.
ذكريات دراستي كلها عبارة عن دخولي البيت، ريحة الأكل اللى بحبه مالية الصالة، خروجها من المطبخ بتضحك وهي بتسألني عملت إيه النهارده ؟!
ردي السخيف عليها تجاهل سخافتي تماماً وهى راجعة المطبخ عشان تحضر لي الغدا عقبال ما أغسل أيدي.
عشرين سنة علمت نفسي أكرهها عمري ما قلتلها ماما عمري ما ناديت عليها أصلاً ! كانت دايما قدامي.
بابا تعب و مات فجأة فضى البيت عليا و عليها حسيت إن وجودي معاها غلط مع أنه مفرقش كتير
عن وقت وجود بابا اللى مكنش موجود !
بلغتها إني هاسيب البيت و أستقل بحياتي مفهمتش نظرة عينيها بس مقدرتش تعترض.
نقلت ف شقة قريبة وكنت كل مدة بروح بيت بابا آخد بقية حاجتي.
ف يوم دخلت ملقيتهاش ! يمكن لأول مرة من ساعة ما دخلت بيتنا !
شوية و لقيتها بتفتح الباب و شكلها تعبان
بعد إصرار
مني وعين مليانة قلق عرفت إنها بدأت رحلة علاج من فترة وإن صحتها بدأت تتدهور.
اليوم ده حسيت بالخوف حسيته لأول مرة في حياتي.
طلبت منها تديني مواعيد زيارة الدكتور عشان أكون موجود معاها رفضت أصريت قالتلي إني مش مضطر أعمل حاجة زى كده ! ( أنا مش أمك ).
قاسية ! كانت قاسية وتعبانه
