اقول لكم قصة حقيقية حصلت معي. قبل تقريبا سنتين كنت حاضر زواج احد الاقارب. قام قريبي وجلسني جنب شايب من الجماعة وقال له اني دكتور. قام الشايب يسبني بدون مقدمات ويدعي علي وانا اول مرة اشوفه في حياتي. صديت عنه وتشاغلت لما شافني كذا مسكني مع كتفي وجرني وقال انا اسف معليش بس اسمعني..

انتم يالاطباء ما تخافون الله! قلت ليش؟ قال تقولون للناس ان شحم الخروف يضر بينما تقولون لهم اكلوا انواع الزيت الثانية وهي كلها بترول. استغربت وقلت طيب زيت الزيتون؟ الرجال ارتبك ثم قال بعد يعصر بمواد كيميائية جاية من البترول (فيك فيك). قلت خير مهيب مشكلة اكل اللي تبي...

قال انا الحين ابثبت لك ان شحم الخروف مهوب ضار وان الزيوت كلها ضارة. قلت كيف؟ قال اخذت لي رجال شرواك للبر ودفننا شحم خروف ودفنا جنبة زيت. وجينا بعد اسبوع لقينا الزيت متكتل في الرمل بينما شحم الخروف اكلته الارض!! وهذا دليل ان شحم الخروف غير ضار..

انا بصراحة احترت في كيف ارد. قال ومرة جانا واحد يراجع في عيادة القلب يقول صدري يعورني من فترة وابي اشوف الدكتور. قلت له قم رح خل الدكتور وش تبيبه (الاثنين جالسين في صالة الانتظار حقت الطبيب) قم رح للبيت وخذ لك كبر كفك شحم خروف واطبخه مع كثره بصل واكله كل يوم..

وبتشوف يوم آلام الصدر حقتك تروح كلها. وخذ هذا اسمي وهذا جوالي وان جاك شي انا اتحمل المسئولية. وقام الرجال وسوا اللي قلت له عليه ولا عاد شفته بعدها.

قلت له طيب يمكن مات؟ قال لا ما جاه شي اكيد في وجهي.

قلت طيب ليش تعطيه نصيحة وتجلس تنتظر الدكتور انت؟ قال انا مشكلتي غير.