ابشركم بعد سنة و٤ شهور تقريبا قدرت اشطب السجل التجاري لشركتي في وزراة التجارة @MCgovSA واقفل ملفها في هيئة الزكاة @Zatca_sa بعد ما اكلت غرامة ٢٠ الف ريال تقريبا بسبب خطأ بسيط في 2018.

بلخص تجربتي في هالثريد للفائدة، لاني اسست شركتي في ١٨٠ ثانية، بس قعدت فوق السنه عشان اقفلها.

الشركه كانت شركة ذات مسؤولية محدودة (شركة شخص واحد) وما بقى عليها لا موظفين ولا عمال ولا أي شي. توقعت معناتها انه الامور سهالات وبيكون الموضوع سلس زي تأسيس الشركة، لكن تتفاجأ ان كل الأتمتة والاجراءات الحلوة والسلسة والتكامل بين الجهات يختفون اذا جيت تصفي الشركه، وترجع للماضي.

نموذج التصفية أساساً فيه كل النماذج المتوفرة، ولازم تقرا الارشادات زين عشان تعرف وش اللي تحملها وتعبيها بالوورد، وتوقعها وتختمها وتصادقها عند الغرفة التجارية (ان تطلب الامر). وعلى الرغم من تأكدي من اوراقي استقعد لي "مدقق" الوزارة واستمر في اعادة الطلبات اللي اقدمها لفترة طويلة.

بعد الكثير من الاستقعاد الغير مفهوم لطلباتي قررت اتواصل مع شركة محاماة واوكلهم متابعة موضوع التصفية. وعلى الرغم من مراجعتهم للوزارة عدة مرات ما كان واضح وش المطلوب اساساً. اضطرينا نجرب ونصير غثيثين جداً لين فجأه انقبل الطلب ولليوم مدري وش اللي غيرناه اساساً في التقديم لكن ضبطت.

وعشان تكونون بالصورة: اول طلب قدمته كان في شهر ٧ سنة ٢٠٢٠، وبدت شركة المحاماة تتابع عني في شهر ٤ سنة ٢٠٢١ (بعد ما طفشت من الموضوع)، وقدرنا اخيراً نشطب السجل التجاري للشركة في شهر ٨ سنة ٢٠٢١. لكن بقى الأخوان في الزكاة طبعاً لازم اقفل حساب ضريبة القيمة المضافة ثم ملفي عندهم.