ناس كتير بعتتلي الفيديو بتاع "اوعى تاكل رز، سبانخ، بطاطس بعد م يباتوا ف التلاجة......اللي هو نفس طريقة الاكل فيه سم قاتل وكدة"

الادعاءات اللي في الفيديو فيها شوية حقائق وشوية مفاهيم فنكوش تماما، فخلينا نوضح كل حاجة بشكل علمي.

هل فعلا تناول "الرز، السبانخ، البطاطس" بعد م يتحطوا ف التلاجة بيمثلوا خطر ع الصحة ؟

SHORT ANSWER

NO

بس خلينا نوضح الموضوع علميا وبشكل بسيط

#ثريد

#يومياتطبيبةتغذية

١. الرز المطبوخ

الادعاء:

"الرز بعد ما يتحط في التلاجة بيبقى فيه بكتيريا خطر."

الحقيقة:

الرز الني طبيعي إنه يحتوي على حويصلات Bacillus cereus، ودي بتبقى موجودة في البيئة حوالينا زي التربة، المياه، والنباتات. وجود الحويصلات دي ف الرز الني مش معناه إن الرز خطر أو فيه مشكلة، بالعكس ده طبيعي جدًا وجزء من دورة حياة الأغذية.

الحويصلات دي مش بتنشط إلا لو توفرت ظروف مناسبة، زي:

1. الرطوبة.
2. الحرارة (بين 4 - 60 درجة مئوية)

الرز الني:

لو متخزن في مكان جاف وف درجة حرارة الغرفة، مش هيحصل أي مشكلة لأن الظروف مش مناسبة لنشاط الحويصلات.

المشكلة بتحصل مع الرز بعد الطبخ، لو الرز اتساب في درجة حرارة الغرفة لفترة طويلة (أكتر من ساعتين)، الحويصلات دي ممكن "تصحى" وتتحول لبكتيريا نشطة.

البكتيريا النشطة دي هي اللي بتنتج السموم، ودي المشكلة الحقيقية لأنها:

3. تسبب التسمم الغذائي.
4. مش بتتأثر بالحرارة، يعني التسخين مش هيقتلها.

الخلاصة:

المشكلة مش في التلاجة ولا ف الرز البايت نفسه، لكن في الطريقة اللي بنتعامل بيها مع الرز المطبوخ. عشان نضمن الأمان:

1. الرز يتاكل او يتشال ف التلاجة بعد ساعتين ماكس من الطبخ (الايام الحر يبقى ساعة)
2. سخنيه كويس جدًا قبل الأكل (لحد ما يبقى سخن جدًا وبخار يطلع منه).

الادعاء:

"السبانخ لما تتحط في التلاجة بتتحول النيتريت اللي فيها لمواد مسرطنة."

الحقيقة:

السبانخ غنية بالنترات، وده طبيعي جدًا لأنها من الخضراوات الورقية المفيدة للصحة. النترات اللي في السبانخ ممكن تتحول لنيتريت لو اتخزنت لفترة طويلة في التلاجة.

النيتريت لوحده مش خطر على الصحة بالكميات الطبيعية اللي بنستهلكها من الأكل.

عشان النيتريت يتحول لمواد مسرطنة (نيتروزامين)، دهةبيحتاج ظروف خاصة جدًا:

حرارة عالية جدًا (زي القلي أو الشوي) وبيئة حمضية. وده غالبًا ومنطقيا مش بيحصل ف التلاجة.

يعني ببساطة، تخزين السبانخ في التلاجة مش كفاية لتحويلها لمواد مسرطنة

لو السبانخ اتخزنت لفترة طويلة جدًا (أكتر من يومين-ثلاثة) أو اتسخنت أكتر من مرة، ده ممكن يزود خطر التحولات الكيميائية اللي بتأثر على قيمتها الغذائية بس مش ييسبب سرطان ولا بينتج عنه مواد مسرطنة.

إزاي نحافظ على السبانخ بأمان؟

1. التخزين الصحيح:

خزني السبانخ الطازة في التلاجة واستخدميها في خلال 1-2 يوم.

لو مطبوخة، برديها بسرعة بعد الطبخ وحطيها في علبة محكمة الغلق.

2. التسخين مرة واحدة:

يفضل إعادة تسخين السبانخ المطبوخة مرة واحدة فقط وتجنب إعادة التسخين أكتر من مرة للحفاظ على قيمتها الغذائية.

الادعاء:

"البطاطس المطبوخة لما تتحط في التلاجة بتطور بكتيريا خطيرة زي Clostridium botulinum، دي البكتيريا الموجودة في الفسيخ."

الحقيقة:

البطاطس المطبوخة ممكن تكون بيئة لنمو بكتيريا زي Clostridium botulinum في ظروف معينة، لكن الموضوع مش مرتبط بالتلاجة نهائيًا.

الخطر مش في التلاجة نفسها، الخطر الحقيقي بيجي لما البطاطس تفضل ملفوفة في فويل بعد الطبخ وتتساب برا التلاجة لفترة طويلة.

1. البطاطس الملفوفة في ورق فويل:

لما البطاطس تتطبخ وتفضل ملفوفة في ورق فويل (ونحط خطوط كتير تحت "فويل" دي ?) لفترة طويلة بعد الطبخ، ده بيخلق بيئة "لا هوائية" (مفيهاش أكسچين).

البيئة دي مثالية جدًا للبكتيريا زي Clostridium botulinum عشان تنمو وتنتج سموم.

الخطر بيظهر لما البطاطس تتساب برا التلاجة لفترة طويلة وهي ملفوفة في الفويل... في الفويل ها!

1. البطاطس المطبوخة في حلة أو صينية:

لو البطاطس مطبوخة في حلة أو صينية ومش ملفوفة في الفويل، الخطر يكاد يكون معدوم لأن البيئة مش لا هوائية.

الحل بسيط جدًا جدًا:

لو البطاطس مطبوخة في فويل، شيلي الفويل أو افتحيه فورًا بعد الطبخ عشان تمنعي البيئة اللا هوائية.

اخيرا بأه البوتيوليزم اللي بتسببه Clostridium botulinum مش بيسبب نزلات معوية ولا إسهال. السموم بتاعته بتسبب شلل خطير، مش مشاكل في الجهاز الهضمي.

اللي ممكن يسبب نزلات معوية وإسهال هو نوع تاني اسمه Clostridium perfringens، وده حاجة مختلفة تمامًا، ومالوش أي علاقة بالبطاطس. يعني الاتنين أمراض مختلفة تمامًا، وكل واحد ليه أعراض وأسباب مختلفة.