الناس مو متحملة فكرة القعدة بالبيت لأن بيوتهم ما تشبههم، بيوتهم ما تمثل لهم ملجأ ترتاح فيه الروح قبل الجسد.

المكان اللي ما تقدر تقعد فيه بدون ما تسوي شي ويكون كافي بالنسبة لك.. ماهو بيت.

البيت هو هروبك من العالم، الفضا من تضيق عليك الوسيعة، والمكان اللي تسافر منه.. وأنت بمكانك.

أتذكر أول ما تزوجت قالي زوجي أول ما دخلت بيتنا:

"Make it yours, make it home"

وعرفت حزتها معنى إن المكان يصير يشبه أصحابه، يشبه روحهم وطاقتهم وأفكارهم ومبادئهم.

كل ما سافرنا ديرة، نحرص يكون لبيتنا نصيب منها لأن هدفنا نأثث بيتنا بذكرياتنا، بالمشاعر الحلوة اللي اختبرناها.م

البيوت المريحة ماهي أكبر البيوت ولا أفخمها، لكن البيوت المبنية على الحب واللي أثاثها اللمة والسوالف ا الحلوة والنفوس الطيبة.

البيوت اللي تفاصيلها عميقة وإن كانت بسيطة.

المرايا اللي شريتها من بازار، البرواز المكسور، اللوحة الباهتة والسجادة القديمة.. كلها أنت.

إذا بيتك ما كان أنت ما تقدر ترجع له ولا تبقى فيه، تحتاج تكون خارجه عشان ما تواجهه.

أما البيت اللي يشبهك ما تبي تطلع منه لأنه يكفيك، ولأن العالم الخارجي مجرد حدث تعيشه لكنه ماهو الأساس.

هُناك نجاح واحد ، وهو أن تتمكن من قضاء حياتك بطريقتك الخاصة. | - كريستوفر مورلي