١- الجو كان فيه نسمة هوا لطيفة من شوية، لطيفة زي بنت الجيران اللي دايماً بتستناني أطلع البلكونة.. النهاردة وبعد غياب أسبوعين، طلعت البلكونة بتاعتي، وكالعادة بلاقيها دايماً لما أطلع على طول.. كنت خايف تعاتبني على غيابي، لكنها قالتلي حاجة تانية خالص؛ "أخيراً.. إزيك.. إفتقدتك أوي.."

٢- إتلخبطت شوية، ومعرفتش أرد غير ب "إزيك، أنا كويس"، ضحكِت هي، وأنا حسيت إن العالم هادي ومش شايف غير إبتسامتها، قالتلي قبل مقولك أي حاجة هروح أعملك كوباية الشاي اللي مشربتهاش معايا من أسبوعين وأجي.. سرحت كتير لحد ما لقيتها جات بتضحك وبتقولي؛ "أكيد وحشتك كوباية الشاي.. أكيد يعني."

٣- كالعادة بنفضل نحاول إن كوباية الشاي توصل، وكالعادة بيدلق نصها، لكني دايماً بحس ان عمري ما شربت شاي بالحلاوة دي، بتفضل هي تتكلم وتسحب مني الكلام، وكالعادة مبحسش أنا بقول إيه معاها، الوقت بيعدي بسرعة.. قبل ما تدخل قالتلي خليك جنب البلكونة بالليل هشغلك أم كلثوم بعد الساعة١٢..

٤- أنا مش معايا حد خالص في حياتي.. من وقت ما شافتني وعملتلي أول كوباية شاي، وأنا بحس إن ده أكتر وقت بتبسط فيه، إحساس إني أستنى حاجة كنت نسيته، لكني دلوقتي مستني الساعة تيجي ١٢ عشان أسمع معاها أم كلثوم، ومبسوط.. وبفكر في جملتها اللي قالتها وهي بتضحك؛ " أكيد وحشتك كوباية الشاي.."