النهاردة احنا طبعا مانعين دخول اى حد من غير ماسك جوه الوحدة اتفاجئت بواحدة بتقولي هحط الطرحة ع بوقي قولتلها مينفعش مكانش حد غلب اتفضلي هاتى ماسك من اى حتة وتعالي بعد خناقة وشتيمة وقلة ادب من اللي حواليها عشان ندخلها من غير ماسك جت واحدة ست كده وسط الزحمة وسحبتها من ايدها

فانا فهمت اللي هيحصل

فقولتلهم يا ريت ما نتذاكاش وواحدة تقلع ماسك تسلفهولها لانها كده بتضرها مش بتنفعها وبتضر نفسها كمان

طبعا اكنى بكلم ف نفسي بس فضلت متابعاها بعنيا اشوف هيحصل ايه قامت المحترمة قلعت كمامتها وادتها للاخت ورجعتلي بيها

فبقولها جبتيه منين قالتلي ملكيش فيه المهم اني لابسة كمامة دلوقتى ومش من حقك ترجعينى

قولتلها اتفضلي بتشتكي من ايه يا ستى قالتلي سخونية وتكسير ف جسمي وكحة شديدة ومش شامة حاجة خالص لسه بقولها اعملي تحليل دم قالتلي اهو واحدة جارتى قالتلي اعمله امبارح ابص عليه ليمفوبنيا 600

طبعا حالة covid 19 " كورونا واضحة جدا قولتلها اعزلى نفسك ف البيت وكتبتلها مضاد حيوى وفيتامين سي و مسكن و قولتلها يستحسن تكشفي عند دكتور صدر او تروحى المستشفي لقيتها بتقولي هو ده الكشف قولتلها اه قالتلي والغاغة دى كلها والبسي كمامة و زفت عشان تقوليلي كده طيب ماشي

خرجت ست الكل من عندى وانا مترقبة اشوف هتعمل ايه راحت قالعة الكمامة قبل ما توصل بوابة الوحدة وادتها للاخت التانية لبستها لبنتها الصغيرة وباستها من الناحيتين ومشيو ايديهم ف ايدين بعض

و طبعا مش دى الحالة الوحيدة اللي عملت كده النهاردة

كام واحدة ست النهاردة عملت كده وبدلو الكمامات