1- حذروا أطفالكم ميقعدوش علي حجر حد

2- متغيروش هدومكم قدامهم

3- متسمحوش لحد يقول لأولادكم : (دي هتبقي مراتي / هجوز الولد ده بنت عمته وهيهيهيهي) أنا عارفة إنها بتتكرر كتير وممكن تكونوا فاكرين إن مفيهاش حاجة بس ده هزار غير مريح لأطفال غير ناضجين وممكن يفتح سكك لو حد قلبه مش سليم

4- لو عيالكم هيلعبوا مع أطفال حاولوا تعرفوا نوع اللعبة (بطريقة غير مباشرة)

5- لو طفلك قالك إنه مش مستريح لما بيشوف حد كبير (حاولوا تعرفوا السبب ) ولو مقالش سبب يبقي الأفضل متوديهوش هناك

6- أي فيلم هتشغلوه قدامهم أكتبوا علي جوجل الأول :اسم الفيلم و Parent guide.....وهيقولك إذا كان الفيلم فيه مشاهد مش مناسبة للأطفال (حتي لو كرتون) ولو معرفتوش يبقي الأفضل إنكم تشوفوا الفيلم الأول

7- علموهم مياخدوش دواء من شخص غريب مهما كان

8- علموهم محدش يلمس المناطق الخاصة

9- علموهم يغسلوا أعضائهم الخاصة بنفسهم عشان للأسف : من الألاعيب اللي بيستخدمها معتدي الأذي مع الأطفال، أبسط مثال : إنه يوقّع عصير علي بنطلون الطفل ويقوله : أنا هغسلهولك

10- د. شهاب الدين له جملة جميلة: في حالة الإساءة الجنسية لازم تمتصوا مشاعر الخزي من الضحية وأوعوا تأكدوها بمثل: إلقاء اللوم عليها أو إيصال معني الخجل أو الخزي العائلي بسببها، وقال: إن الإحتواء والحماية بيفرّغ سلطة الإساءة عن الطفل وبيكسر دائرة الإساءة اللي ممكن يفضل عايش فيها