راح اللي كان ينتظر القرآن يخلص ويصرخ لباقي اليهال صدق الله العظييييم!!
وتقاعدت اللي كانت تبچي لما أمها تمشطها وتعجّف شعرها…وصار ريّال اللي كان يسوّي نفسه مختنق لما أمه تسبحه…والمديرة اليوم كانت بالزهرات وهي صغيرة… وشيّب اللي كان بصغره يطلب جغمة ويشرب نص الكولا…
وصار مدير اللي كان يشقح من الطوفة أيام المدرسة… وتوفى المينون اللي كان يقعد يم البقالة… ومهاوشچي الفريج اليوم يدوّر العافية… وبو سنسون مسك منصب… واللي كانوا يعايرونها أم صنديحة صارت وكيلة… وشايب الفريج اللي يطقنا صار عظام رميم… والياهل اللي كانت بالحبّاسة تزوجت وعيّلت
قلاص الكوكتيل صار بلاستيك…واختفى همبرغر بالبيض…وراحت أيام الترويح السياحي…والبحر الصافي صار خابط…وراعي الخام ما قام يمر الفريج…ولما نقول لأحد احلف قام يحلف وما يقول وحياة الزحلف…والبنت نست ان كان عليها حلقة لو مقص لو موس لو دبوس…واختفت الجيتي الزيتية من على خط الصباحية…
وكيكة سارالي نسوها وصارت ذكرى… ومحّد قام ياكل طروح… واندثر اللي يبيع عنچكك چكك نِقِلْ بَنَك حب… ومحد قام يسأل راعي البرّد اذا عنده برّد صاروخ ولما يقول اي يقولوله طيْرَه… وتقاعد الشاطر بو قلبين وحاشه ضغط وسكّر بعدما تخرج وصار موظف تحت اللي كان يغش منه…
ودفتر الادخار انترست صفحاته بالطوابع ونسينا نوديه البنك واليوم صار ذكرى لحلم طفل يبي يفتح حساب بشطارته وادخاره… والبنت الصغيرة كبرت وشرت جنطة طيّرت ثروتها الكبيرة… وتوفى الأبو اللي يطق اليهال لما يلعبون يم غرفته وهو مقيّل.. واليهال كبروا ولما يمرون غرفته يتمنون لو يطلع يطقهم!
