الزوج : ها عملتي إيه علي الغدا؟ متنسيش أختي وجوزها جايين إنهاردة.
الزوجة : عاملة سمك مقلي.
الزوج : هممم كويس... أي مساعدة؟
الزوجة : لا شكراً أنا خلاص بقطع ديل آخر سمكة أهو والتتبيلة جاهزة.
الزوج : بتقطعي ديل السمك!! طيب ليه؟
الزوجة : يعني عاوزني أقلي السمكة بديلها؟
??
الزوج : وإيه المانع يعني؟
الزوجة : هههه يا راجل حرام عليك.
الزوج : حرام !! هي وصلت للحرام؟ لأ لازم أعرف ليه بقي.
الزوجة : والنبي بلاش إفتكاسات روح غير هدومك متضيعش الوقت الناس علي وصول
الزوج : لا بجد ليه حرام نقلي السمك بديله؟
??
الزوجة : يا راجل عاوز تضحّك أختك عليا؟ تقول عليا إيه؟ وأنت عارف لسان اختك.
الزوج : يعني اختي كمان هتتريق لو شافت السمك مقلي بديله؟
الزوجة : طبعاً... وهتمسكهالي وتدور تحكي لستات العيله كلها وتركبني العيب.
الزوج : ياااااه... للدرجادي قلي السمك بديلة حاجة حرام وكمان عيب؟
??
الزوجة : مش حرام بمعني حرام يعني بس همه علمونا كدة.
الزوج : مين دول اللي علموكو ؟
الزوجة : أمهاتنا... أمي علمتني كده... إتريق بقي خلي نهارك ميعديش!!
الزوج : لا لأ الطيب أحسن... بس هيه مقلتلكيش عن سبب وجوب قطع ديل السمكة قبل قليها؟
??
الزوجة : ييييييييه بدأنا في الفلسفة وأنا عارفة مش هخلص فففففففف.
الزوج : هههههه لا بجد أصل الموضوع مُلفت للنظر ودفاعك بتلقائية عن قطع ديل السمكة مع إستخدامك لكلمات زي (حرام , عيب , الناس تاكل وشي) مخليني عاوز أعرف عِلة التحريم وسبب العيب.
??
