#قاليك الدنيا آخر شهر صاحبك جا داخل عصيراَ بدري شايل ليك أكياس موز وبرتقان وحليب وسكر وبسكويت عموما صاحبك خمخم الدنيا كلها

آها بتاع الرقشة دخل معاهو الحاجات وبطيخة

نسيت ما اقول ليكم. قلع جزمتو ختاها في جنب الباب وقلع ملابسو أخد ليهو دش ولبس ليهو عراقي شحم ورل بس

أها بتول جهزت الغدا

إتغدو في ضل العصر وجابت عدة الجبنة ولعت الكانون الفحم طق طرق طق تنتنت البن الفندق

فيهو كشكوش بغطايات بيبسي وفانتا وميرندا

شربو قهوتم وهي دخلت تضمضم في عدة الغدا

وتغسل وترتب وهو إتفنقل في السرير وبقرا في جريدتو ساكت والرادي شغال جنبو مرة الصوت يعلي ومره يشخشخ

آها الدنيا خلاص ماشة على المغرب بنفسو قام طلع السراير في السهلة ورش الحوش بمزاج. قالت ليهو كدي النقوم نسوي شاي المغرب جابت الموز والبرتقان وقطت البتيخة

في الصينية صاحبك صنقر في نص السرير

وبعاين ليها داخلة المطبخ ومرقت شايلة الشاي برضو بعاين ليها هي لاحظت إنو مركز فبها شديد

وقفت وختت إيدينها في نصها قالت ليهو مالك

ما ياني الزمان ديك غبيتك ولا عيونك طششن

طنطنت وهي دخلت المطبخ وبتطنطن براها الراجل ده جن ولا شنو تاني جات مارقة وهو بعاين ليها قالت ليهو تعال أكلني صاحبنا حب يلطف الجو

قال ليها يا عيوني

قالت ليهو عيونك بالرمد اليخليك ما تعرف إيدك اليمين من إيدك اليسار ها راجل أعقل شوية

صفق يدينو في بعض وقام لبس جلابيتو

ومشا النادي يلعب ضمنة مع ناس حمد والمجوبك

وبطنطن والله كلام إبراهيم ود المبارك صحي الرومانسية يوم وزعوها كانن غايبات https://t.co/lqbxoeZwa4