١-

ده ثريد عن حاجة من زمان جدا إفتكرتها بسبب تباين مواقف الدول من كورونا.

كلام چونسون و ميركل و ترامب عن إنتشار فيروس كورونا فكرني بأحداث قديمة جداً قرأت عنها لما حبيت أعرف ليه إنجلترا إختارت فلسطين لتوطن اليهود و عمل دولتهم.

الأحداث دي حصلت في الفترة من 1903 ل 1917.

٢-

بالتحديد في سنة 1907، رئيس وزراء إنجلترا هنري كامبل Henry Campbell قدم مذكرة في مؤتمر الدول الإستعمارية بيؤكد فيه إن منطقة شمال إفريقيا وشرق المتوسط هي الوريث المحتمل لـ"حضارة الرجل الأبيض".

المذكرة دي هي سبب خراب الدول العربية لحد دلوقتي بس مش ده موضوعنا.

٣-

"حضارة الرجل الأبيض" ده كان مسمى الحضارة الأوربية وقتها.

سبب الثريد عن المسمى ده.

الدول الإستعمارية هي بريطانيا وفرنسا وألمانيا وايطاليا و أسبانيا والبرتغال وهولندا وبلجيكا.

حكومات الدول الإستعمارية كانت مقتنعة أن الرجل الأبيض (الأوربي) هو الأقدر على حكم العالم.

٤-

طيب ليه حكومات الدول الإستعمارية مقتنعة إن الرجل الأبيض (الأوربي) هو الأقدر على حكم العالم؟

لإنهم مؤمنين تمام الإيمان إن الرجل الأبيض متفوق فكرياً وبدنيًا على أي عِرق آخر.

و إدعوا أسباب لتفوق الرجل الأبيض علشان يقنعوا بيها نفسهم ويبرروا جرائم الإستعمار.

٥-

قالوا إن أسباب تفوق الرجل الأبيض هي كمية الحروب و الأوبئة والمجاعات اللي عدت على أوروبا في القرون السابقة وعصر النهضة.

كانوا مؤمنين إن الحروب والأوبئة والمجاعات أخدت الضعيف، واللي قدر يتجاوزها هو القوي و الذكي.

وبالتالي الجيل الموجود في أوروبا وقتها هو الأقوى و الأذكى.