يوم ٩ ديسمبر ٢٠٢١ استلمت مفتاح البيت و حققت فيه حلمي..

حلم مرتبط بطفولتى،بعيلتى ،مرتبط بالماضى و مستقبلي

الموضوع مكنش سهل و كان فى صعوبات و احباطات كتير بس لما ببصله دلوقتي ما اعرفش ازاى اصلا تم و اتحقق..

هشارك معاكم ثريد ازاى حققت حلمي و جبت البيت اللى كنت طول عمري بحلم بيه. https://t.co/L1XrJPA0nV

معاش هرجع معاكم للموضوع من الأول خالص ?

انا اتولدت فى اليونان من اسرة عادية متوسطة أب مصري و أم يونانية و تقريبا طفولتى قضيتها فى اليونان.. كنا بنيجى مصر طبعا نزور أهل أبويا و بعد فترة أهلي قرروا نهاجر ل مصر و نعيش فيها و نروح اليونان فى الاجازات علشان نزور أهل مامتي..

فا ذكريات طفولتى مرتبطة أكتر باليونان و علشان كدة كان حلمي ان لما أكبر أجيب بيت هناك..

و الحلم ده كان القريبين مني عارفينه و كنت لما بقابل ساعات ناس أول مرة بقولهم الموضوع ده

بس ازاى و ليه فعلا ما اعرفش بس ببقا مبسوط و انا بشاركهم و خلاص

و حتى كنت بكتب ده على فيسبوك و انستجرام https://t.co/w2JNRobke0

انا من كتر ما كنت مصدق ان الحلم ده فى يوم هعرف احققه كنت بتخيل كل حاجة.. الديكور و الالوان و شكل البيت حتى كنت مختار لون التلاجة مثلا فى ٢٠١٣ و فاكر لما قولت ل ميرنا و احنا شغالين فى مجلة ٧ أيام وقتها انا هجيب تلاجة حمرا للبيت!

و حصل و جبتها ❤️ https://t.co/fQd10czO0h

وقت الكورونا كنت متلخبط و تايه و الضغط مع القلق خلاني اخد القرار و قررت ان خلاص ده وقته و فعلا بدأت احوش و استغنيت عن كل الرفاهيات علشان اجمع الفلوس و كنت بسهر للصبح اتفرج على البيوت و اسعارها و ابعت لينكات ل قرايبى علشان يكلموهم لحد ما يفتحوا السفر و نروح بنفسنا نشوف البيوت دى