أنا راجل مش بفطر مع زوجتي كل الأيام بسبب ظروف شغلي كمنهدس في شركة، ساعات بفطر مع صحابي، وعشان كدا بحب أعوضها في السحور وأخليه مُميز.

ربنا رزقني بالبنت اللي بحبها، ورزقني أطفال منها وعرفنا نعلمهم ونربيهم صح، كان أكبر طفل عندي في ٦ إبتدائي اسمه (كريم) ..

كنت طول الوقت بقوله أنا بحب اسمك، حاول تكون قده، خليك دايمًا أهل كرم، وجيت في يوم كنا في رمضان، بعت كريم للسوبر ماركت يجيب لانشون وبيض وجبنة، استنينا شوية ولاقيته داخل إيده فاضية، بقوله فين الأكل، قالي أصل الفلوس وقعت مني

لسه مامته هتقومله شديتها من إيديها وقولتلها أكيد غصب عنه..

كرم ربنا كتير أهو هنزل أشتري أنا وأجي، وأنا طالع سمعت جاري الجديد بيقول لمراته:

"كنتي لسه بتقولي هنتسحر إيه وزعلانة عشان صرفت الفلوس على علاجك، أهو ربنا بعتلنا بيض وجبنة ولانشون"

وقفت شوية وقولت لنفسي أيه ده؟ ده نفس السحور اللي بعت كريم يجيبه؟ ..

دخلت الشقة ووقفته قدامي وقولتله:

"الفلوس موقعتش منك ياكريم، لو مقولتش الحقيقة عقابك هيبقى مرتين، مرة عشان كدبت ومرة عشان اتصرفت من ورايا"

لاقتيه وقف وسكت شوية، وبعدين بص للباب وقال:

جارنا الجديد حالته المادية مش حلوة زينا، ومش موظف زي حضرتك، وزوجته مريضة كانسر ..

وانا طالع سمعتها كانت بتعيط وبتقوله إنها نفسها تموت عشان متبقاش حمل عليه، ووسط الكلام قالت إن الفلوس كلها راحت للعلاج ومفيش فلوس يجيبوا أكل للسحور، خبطت عليهم وقولتلهم دي وجبة للسحور بنوزعها ومشيت، الراجل باسني من راسي وكان مبسوط ..