1\9

ينابيع الموت في قطعة سما

في 2010 كنت مع فريق من أهم خبراء سلامة الغذاء في لبنان، وكان عنا مشروع زغير: نبرم لبنان كله ونفحص سلامة مياه الينابيع والأنهر ومياه عابري السبيل. ضلينا شهر عم نتقبّر مع وزارة الطاقة (المسيو جبران باسيل العظيم) ليعطينا لائحة بالينابيع.

2\9

المهم، بعد صراع طويل، تحنّن علينا مدير عام الوزارة باللائحة السرّية مع الإصرار على إنه هيدي لائحة سرية ولا يمكن بأي حال من الأحوال إنها تطلع على العلن لأسباب تتعلق بالأمن القومي (مش عم بمزح). اللائحة كانت عبارة عن ورقة مقلعطة بتشبه وراق رياض سلامة، مكتوبة باليد

3\9

وفيها أسامي حوالي 10 ينابيع نصن إختفى عن وجه الكرة الأرضية.

قررنا نسعى بالتمويل وبلشنا نقدم على المنظمات الدولية والمحلية والحكومية. كل طلباتنا نرفضت لأن قال شو: ما في فايدة واضحة للمجتمع ممكن تبرر صرف أية مصاري على المشروع. وفي جمعيات قالت إنه المشروع كتير زغير ومش خرج

4\9

أنا شخصياً كنت مكيّل كلفة المشروع بحوالي 7 آلاف دولار على سنة ونص. قال لأ، كتير قليل ما فينا نعطيكن. لازم يكون بالخمسين ألف وما فوق. أحد الأشخاص الواصلين عرض إنه نقدم طلب بـ 100 ألف، هو بياخد النص ونحنا مناخد النص، وطبعاً شحطناه على الفور.

5\9

في نهاية المطاف، موّلنا المشروع من جيبتنا، كل واحد حسب قدرته، مع مساهمة تقنية قيّمة جداً من الجامعة الأميركية (الفحوصات المخبرية وما شابه). قدرنا نخلّص المشروع خلال ستة أشهر بكلفة 5500 دولار لا غير. جمعنا العينات من 119 ضيعة من كل محافظة وقضاء ومن كل مدينة وضيعة كبيرة.