ثريد ... :

وأنا عندي 8 سنين شوفت مع جدي خبر تفكك الإتحاد السوفييتي في التلفزيون.

وكطفل فضولي بدأت أسأله أسئله كتير عن الموضوع، فبدأ جدي - في مهمة مستحيلة - إنه يشرح فكرة الشيوعية والرأس مالية لواحد عنده 8 سنين، وطبعا إضطر يبسط على الآخر ويمكن أخل بالمفهوم،

بس هو كتر خيرة أصلا إنه حاول يشرح ، قال لي إن الشيوعية هي إن الناس كلها تشتغل، وبعدين ناخد ناتج شغلهم ده، نقسمه على كل الناس بالتساوي...يعني الدكتور مايفرقش عن البواب أو المهندس أو سواق التاكسي..كله زي بعض تقريبا..الكويس زي الوحش والناجح زي الفاشل..وإنها حاجه بتقتل الطموح..

لأنها مش بتحفز الناس على النجاح ، في حين إن الرأس مالية دي معناها إن كل واحد يشتغل، وعلى قد ما يشتغل على قد ما يكسب.

تنجح قوي يبقى معاك فلوس كتير قوي...تفشل..مش هتلاقي تاكل! وفاكر كويس إن إنطباعي كطفل إتقال له الكلام ده، هو إنه بوضوح شديد الرأس ماليه، وإن مايتحطش سقف للنجاح

وإني أكسب على قد ذكائي وجهدي، هي الفكرة العادلة..مش معقول أشتغل وغيري مايشتغلش ونبقى في الآخر زي بعض.

ورغم إن الشيوعية والرأس مالية أكيد أنظمة معقدة كتير عن كده، بس الشرح بتاع جدي ده التعليم والإعلام والعيشة هنا، ما أضافوش له كتير لحد ما كبرت، ومعظم الناس الغير مهتمه، برضه

فكرتها ماتفرقش عن كده كتير.

وفكرة إن الإتحاد السوفييتي إنهار، دي نفسها بقت زي دليل، إن الشيوعية والرأس مالية دخلوا إختبار عملي، والشيوعية فشلت وخسرت، والموضوع حُسِم خلاص، فمافيش نظام كويس غير الرأس مالية..والموضوع تم إثباته